ఎలాంటి దాడులు జరిగినా వెంటనే బదులివ్వాలి.. ఇరాన్ సుప్రీం లీడర్ కీలక ఆదేశాలు

అమెరికా, ఇజ్రాయెల్‌ నుంచి ఎలాంటి దాడులు ఎదురైనా తక్షణమే ప్రతీకార చర్యలకు దిగాలని ఇరాన్‌ సుప్రీం లీడర్‌ మొజ్తాబా ఖమేనీ ఆ దేశ సైన్యాన్ని ఆదేశించినట్లు స్థానిక మీడియా వెల్లడించింది. దాడులు జరిగే ప్రాంతంతో సంబంధం లేకుండా ప్రతిస్పందించాలని సూచించినట్లు తెలిపింది. అమెరికా, ఇజ్రాయెల్‌ ఆస్తులపై దాడులు చేసేందుకు లక్ష్యాల జాబితాను ఎప్పటికప్పుడు అప్‌డేట్‌ చేయాలని ఆదేశించినట్లు పేర్కొంది. అలాగే మందుగుండు సామగ్రి, ఆయుధాల ఉత్పత్తిని పెంచడంతో పాటు సైనిక నిఘాను బలోపేతం చేయాలని, స్వదేశీ రక్షణ సామర్థ్యాలను అభివృద్ధి చేయాలని ఖమేనీ సూచించినట్లు వెల్లడించింది.

మరోవైపు, హర్మూజ్ జలసంధిని పూర్తిగా తెరిచేందుకు పట్టే సమయాన్ని రెండు రోజులకు తగ్గించేలా మధ్యవర్తులతో కొత్త ప్రతిపాదన రూపొందించినట్లు ఇరాన్ విదేశాంగ మంత్రి అబ్బాస్ అరాగ్చీ తెలిపారు. గతంలో వారం రోజుల్లో జలసంధిని తెరుస్తామని చేసిన ప్రతిపాదనను అమెరికా తిరస్కరించిన విషయం తెలిసిందే. తాజాగా ఓ వార్తాసంస్థకు ఇచ్చిన ఇంటర్వ్యూలో అరాగ్చీ మాట్లాడుతూ.. విస్తృత చర్చలకు అమెరికా చేస్తున్న ప్రయత్నాలను సానుకూల చర్యగా అభివర్ణించారు. శాంతి చర్చలపై అమెరికా ఉపాధ్యక్షుడు జేడీ వాన్స్ పంపిన లేఖను జాగ్రత్తగా సమీక్షించినట్లు చెప్పారు. ఇరాన్ షరతులకు అమెరికా అంగీకరిస్తే చర్చలు ప్రత్యక్షంగా జరపాలా, పరోక్షంగా కొనసాగించాలా అనే అంశంపై నిర్ణయం తీసుకుంటామని వెల్లడించారు.