ఎస్‌ఐఆర్‌ వివాదంలో మళ్లీ తెరపైకి శేషన్‌ పేరు

మాజీ ప్రధాన ఎన్నికల కమిషనర్‌ టి.ఎన్‌. శేషన్‌కు సంబంధించిన “ఐ ఈట్‌ పాలిటిషియన్స్‌ ఫర్‌ బ్రేక్‌ఫాస్ట్‌” అనే ప్రసిద్ధ వ్యాఖ్య ప్రస్తుతం ఎన్నికల సంఘం ప్రత్యేక సమగ్ర ఓటర్ల జాబితా సవరణ ప్రక్రియపై జరుగుతున్న చర్చల నేపథ్యంలో మరోసారి తెరపైకి వచ్చింది. ఇండియన్‌ ఎక్స్‌ప్రెస్‌ దర్యాప్తు కథనం ప్రకారం.. ఎన్నికల కమిషనర్లు సుఖ్‌బీర్‌ సింగ్‌ సంధు, వివేక్‌ జోషి గత పది నెలల్లో కనీసం 14 సార్లు ఎస్‌ఐఆర్‌కు సంబంధించిన పలు నిర్ణయాలపై అధికారికంగా అభ్యంతరాలు వ్యక్తం చేశారు. కొత్త ఓటర్ల నమోదు కోసం ఫారం-6లో మార్పులు, ఓటర్ల పేర్ల తొలగింపు, చేర్పులు, ఓటర్ల జాబితా సమాచారాన్ని కేంద్రీకరించడం వంటి అంశాలపై వారు ప్రశ్నలు లేవనెత్తినట్లు నివేదిక పేర్కొంది.

ఈ నివేదికతో ముగ్గురు సభ్యులతో కూడిన ఎన్నికల సంఘం నిర్ణయాల ప్రక్రియపై మరోసారి చర్చ మొదలైంది. అయితే ఎన్నికల సంఘం మాత్రం తమ నిర్ణయాలు ఏకగ్రీవంగానే తీసుకున్నామని, ఇద్దరు కమిషనర్లు నమోదు చేసిన అభిప్రాయాలు సాధారణ చర్చా ప్రక్రియలో భాగమేనని స్పష్టం చేసింది. దీంతో ఎస్‌ఐఆర్‌ ప్రక్రియపై వివాదంతో పాటు ఎన్నికల సంఘం అంతర్గత నిర్ణయ ప్రక్రియ, పారదర్శకతపై కూడా చర్చ కొనసాగుతోంది. ఇదే సమయంలో ఎన్నికల సంఘం అధికారాలను బలోపేతం చేసిన శేషన్‌ హయాం, ఆయనకు సంబంధించిన ప్రసిద్ధ వ్యాఖ్య మరోసారి ప్రజల దృష్టిని ఆకర్షిస్తోంది.