డీలిమిటేషన్ బిల్లు కోసం పార్లమెంట్ ప్రత్యేక సమావేశాలు.. అమిత్ షా ప్రకటన

డీలిమిటేషన్ బిల్లు ఆమోదం కోసం పార్లమెంట్ ప్రత్యేక సమావేశాలు నిర్వహించనున్నట్లు కేంద్ర హోంమంత్రి అమిత్ షా వెల్లడించారు. మీడియా చిట్‌చాట్‌లో ఆయన ఈ విషయాన్ని తెలిపారు. పార్లమెంట్ వర్షాకాల సమావేశాలు ఇంకా ప్రొరోగ్ కాలేదని, అందువల్ల ప్రత్యేక సమావేశాల నిర్వహణకు 48 గంటల ముందు సభ్యులకు సమాచారం అందిస్తే సరిపోతుందని పేర్కొన్నారు. డీలిమిటేషన్‌కు సంబంధించిన రాజ్యాంగ సవరణ బిల్లు ఆమోదానికి అవసరమైన మూడింట రెండొంతుల మెజారిటీ కంటే ఎన్డీఏకు అదనంగా మరో 15 మంది సభ్యుల మద్దతు ఉందని అమిత్ షా తెలిపారు.

మరోవైపు, విదేశీ విరాళాల నియంత్రణ చట్టం (ఎఫ్‌సీఆర్‌ఏ) సవరణ బిల్లును పార్లమెంట్ శీతాకాల సమావేశాల్లో ప్రవేశపెట్టనున్నట్లు ఆయన వెల్లడించారు. డీలిమిటేషన్ బిల్లు ఆమోదం కోసం ప్రత్యేక సమావేశాల నిర్వహణకు ప్రభుత్వం సిద్ధమవుతోందని, అవసరమైన పార్లమెంటరీ మద్దతు తమకు ఉందని అమిత్ షా వ్యాఖ్యలు స్పష్టం చేస్తున్నాయి.