శ్రీవారి లడ్డూ విక్రయాల్లో సరికొత్త రికార్డు

ఈ ఏడాది మే నెలలో తిరుమల శ్రీవారి లడ్డూ ప్రసాదం విక్రయాలు కొత్త రికార్డును సృష్టించాయి. మొత్తం 1.21 కోట్ల లడ్డూలను విక్రయించినట్లు తిరుమల తిరుపతి దేవస్థానం (టీటీడీ) వెల్లడించింది. గతంలో 2024 మే నెలలో 1.01 కోట్లు, 2025 మే నెలలో 1.10 కోట్ల లడ్డూలు విక్రయించగా, ఈసారి ఆ సంఖ్య మరింత పెరగడం విశేషం.

భక్తుల అవసరాలను తీర్చేందుకు రోజుకు సగటున 4.08 లక్షల లడ్డూలను తయారు చేస్తూ, దాదాపు 68 టన్నుల ముడి పదార్థాలను వినియోగిస్తున్నారు. ఇటీవలి కాలంలో శ్రీవారి లడ్డూ ప్రసాదం నాణ్యత, రుచి మరింత మెరుగుపడటంతో భక్తులు హర్షం వ్యక్తం చేస్తున్నారు. సంప్రదాయం, నాణ్యత, భక్తి భావనలకు ప్రతీకగా నిలిచిన శ్రీవారి లడ్డూ తిరుమల మహిమను ప్రపంచవ్యాప్తంగా చాటుతోంది.