రేపు విజయవాడకు తమిళనాడు సీఎం విజయ్‌..

తమిళనాడు ముఖ్యమంత్రి సి. జోసెఫ్‌ విజయ్‌ మంగళవారం (అక్టోబర్‌ 13, 2026) విజయవాడలో పర్యటించనున్నారు. ఇంద్రకీలాద్రిపై కొలువుదీరిన శ్రీ కనకదుర్గమ్మను ఆయన దర్శించుకోనున్నారు. షెడ్యూల్‌ ప్రకారం సాయంత్రం 4.30 గంటలకు అమ్మవారిని దర్శించుకోనున్నట్లు సమాచారం. సీఎం విజయ్‌ పర్యటన నేపథ్యంలో తమిళనాడు ముఖ్యమంత్రి కార్యాలయానికి చెందిన భద్రతా సిబ్బంది సోమవారం ఇంద్రకీలాద్రికి చేరుకుని ఏర్పాట్లను పరిశీలించారు. ఆయన ప్రయాణించే మార్గాన్ని తనిఖీ చేసి భద్రతా ఏర్పాట్లపై సమీక్షించారు.

ఇంద్రకీలాద్రిపై దసరా నవరాత్రి వేడుకలు, విజయవాడ ఉత్సవ్‌ 2.0ను ఆంధ్రప్రదేశ్‌ ప్రభుత్వం నిర్వహిస్తోంది. ఈ వేడుకలకు హాజరు కావాలని కోరుతూ ఏపీకి చెందిన టీడీపీ ఎంపీలు ఇటీవల చెన్నైలో సీఎం విజయ్‌ను కలిసి ఆహ్వానించారు. ఎంపీలు కేశినేని చిన్ని, లావు శ్రీకృష్ణదేవరాయలు, మాగుంట శ్రీనివాసులు రెడ్డి, జీఎం హరీశ్‌ బాలయోగి ఈ భేటీలో పాల్గొన్నట్లు సమాచారం. విజయవాడ పర్యటనలో భాగంగా ఏపీ ముఖ్యమంత్రి చంద్రబాబు నాయుడుతో సహా రాష్ట్ర నేతలతోనూ విజయ్‌ సమావేశమయ్యే అవకాశం ఉంది.