విద్యార్థులకు పరిశోధన ఆధారిత విద్య అందించాలి - శ్రీధర్‌బాబు

వేగంగా మారుతున్న సాంకేతిక పరిజ్ఞానానికి అనుగుణంగా విద్యార్థులకు పరిశోధన ఆధారిత విద్యను అందించడం ఎంతో కీలకమని రాష్ట్ర పరిశ్రమలు, ఐటీ శాఖ మంత్రి దుద్దిళ్ల శ్రీధర్‌బాబు అన్నారు. తెలంగాణ ఉన్నత విద్యామండలి ఆధ్వర్యంలో జేఎన్‌టీయూలో నిర్వహించిన ‘రీసెర్చ్‌ ఎడ్యుకేషన్‌ అడ్వాన్స్‌మెంట్‌ కాన్‌క్లేవ్‌ ఇన్‌ హైదరాబాద్‌’ (రీచ్‌) 2026 సదస్సును శనివారం ఆయన ప్రారంభించారు. వికసిత్‌ భారత్‌, తెలంగాణ రైజింగ్‌ 2047 లక్ష్యాలకు అనుగుణంగా పాఠ్యప్రణాళికల్లో మార్పులు తీసుకురావడంతో పాటు విద్యార్థుల్లో నైపుణ్యాలను పెంపొందించాల్సిన అవసరం ఉందన్నారు. పరిశ్రమల సహకారంతో ప్రతి విశ్వవిద్యాలయంలో ఇంక్యుబేషన్‌ సెంటర్‌ ఏర్పాటు చేయాలని సూచించారు.

సైయెంట్‌ వ్యవస్థాపకుడు బీవీ మోహన్‌రెడ్డి మాట్లాడుతూ పరిశ్రమలు కోరుకుంటున్న ప్రాయోగిక అనుభవాన్ని విద్యార్థులకు తరగతి గదిలోనే అందించేలా విద్యా ప్రణాళికలు రూపొందించాలని సూచించారు. పరిశోధన, ఆవిష్కరణలు తరగతి గదిలోనే ప్రారంభమయ్యేలా విద్యా వ్యవస్థను తీర్చిదిద్దాలని మంత్రి ఆకాంక్షించారు. ఈ సందర్భంగా తెలంగాణ ఉన్నత విద్యామండలి ఛైర్మన్‌ బాలకిష్టారెడ్డి రచించిన ‘హైదరాబాద్‌ ఏ హబ్‌ ఆఫ్‌ ఎడ్యుకేషన్‌, రీసెర్చ్‌, ఇన్నొవేషన్‌, ఆంత్రప్రెన్యూర్‌షిప్‌’ పుస్తకాన్ని శ్రీధర్‌బాబు ఆవిష్కరించారు. కార్యక్రమంలో ఉన్నత విద్యామండలి వైస్‌ ఛైర్మన్‌ ప్రొఫెసర్‌ ఈ.పురుషోత్తం, కార్యదర్శి ప్రొఫెసర్‌ శ్రీరాం వెంకటేశ్‌, జేఎన్‌టీయూ, ఉస్మానియా విశ్వవిద్యాలయాల వీసీలు టి.కిషన్‌కుమార్‌రెడ్డి, కుమార్‌ తదితరులు పాల్గొన్నారు.