అయోడిన్‌ బిళ్లల పంపిణీ వార్తలను ఖండించిన ఇరాన్‌

అమెరికా నుంచి సైనిక దాడులు జరిగే అవకాశం ఉందన్న ఆందోళనల నేపథ్యంలో ఇరాన్‌లోని అణు కేంద్రాల సమీపంలో నివసించే ప్రజలకు అయోడిన్‌ బిళ్లలు పంపిణీ చేస్తున్నట్లు ఇటీవల వార్తలు వెలువడ్డాయి. బ్రిటన్‌కు చెందిన ది టైమ్స్ పత్రిక కథనం ప్రకారం, ఇరాన్‌ ఆరోగ్య మంత్రిత్వ శాఖకు చెందిన ఓ గుర్తుతెలియని అధికారి ఈ విషయాన్ని వెల్లడించినట్లు పేర్కొంది. యుద్ధ పరిస్థితులు నెలకొన్నప్పుడు అణు కేంద్రాల చుట్టూ రెండు నుంచి మూడు కిలోమీటర్ల పరిధిలో నివసించే వారికి ముందుజాగ్రత్తగా ఈ బిళ్లలను అందిస్తున్నట్లు ఆ అధికారి చెప్పినట్లు కథనం పేర్కొంది. అయితే, పొటాషియం అయోడైడ్‌ బిళ్లలు కొన్ని అణు అత్యవసర పరిస్థితుల్లో రేడియోధార్మిక అయోడిన్‌ను థైరాయిడ్‌ గ్రంథి గ్రహించకుండా నిరోధించడంలో మాత్రమే సహాయపడతాయి. అణు పేలుడు లేదా ఇతర రకాల రేడియేషన్‌ నుంచి ఇవి రక్షణ కల్పించవు.

ఈ వార్తలపై ఇరాన్‌ ఆరోగ్య మంత్రిత్వ శాఖ ప్రజా సంబంధాలు, సమాచార కేంద్రం అధిపతి హొస్సేన్‌ కెర్మాన్‌పూర్‌ స్పందించారు. ఆరోగ్య శాఖకు చెందిన ఏ అధికారీ ది టైమ్స్ పత్రికతో మాట్లాడలేదని, తమ మంత్రిత్వ శాఖకు ఆపాదించిన వ్యాఖ్యలు అవాస్తవమని స్పష్టం చేశారు. వివిధ ముప్పులు, అత్యవసర పరిస్థితులను ఎదుర్కొనేందుకు ఇరాన్‌ ఆరోగ్య వ్యవస్థ సిద్ధంగా ఉందని పేర్కొన్నారు. ప్రస్తుత ఉద్రిక్త పరిస్థితుల్లో ధ్రువీకరించని వార్తలను ప్రచురించడం బాధ్యతారాహిత్యమని విమర్శించారు. అయితే, అణు కేంద్రాల సమీపంలోని ప్రజలకు అయోడిన్‌ బిళ్లలు పంపిణీ చేశారా లేదా అనే విషయాన్ని కెర్మాన్‌పూర్‌ తన ప్రకటనలో స్పష్టంగా ఖండించలేదు. దీంతో ఈ పంపిణీకి సంబంధించిన వార్తలు ఇంకా ధ్రువీకరణకు నోచుకోలేదు.