బిగ్‌బాస్ తెలుగు 10 డే 60 : అమన్‌పై ప్రతీకారం తీర్చుకున్న త్రిగుణ్

బిగ్‌బాస్ తెలుగు సీజన్ 10 హౌస్‌లో ఆట రోజురోజుకూ మరింత రసవత్తరంగా మారుతోంది. హౌస్‌మేట్స్ మధ్య పోటీలు, గొడవలు, భావోద్వేగాలు ప్రేక్షకుల్లో ఆసక్తిని పెంచుతున్నాయి. తాజాగా 60వ రోజు నిర్వహించిన ‘రివెంజ్ అండ్ రివార్డ్’ ప్రక్రియలో భాగంగా బాస్కెట్ టాస్క్ నిర్వహించారు. ఈ పోటీలో దేబ్జానీ, నరేష్, త్రిగుణ్, రామ్ ప్రసాద్, శివకుమార్ పాల్గొన్నారు. హౌస్‌మేట్స్ హోరాహోరీగా పోటీపడగా, దేబ్జానీ గట్టి పోరాటం చేసింది. చివరకు త్రిగుణ్, శివకుమార్ ముందంజలో నిలవడంతో వీరిద్దరి మధ్య టైబ్రేకర్ నిర్వహించారు. ఈ కీలక పోటీలో త్రిగుణ్ విజయం సాధించి, వచ్చే వారం తన కుటుంబ సభ్యులను కలుసుకునే ప్రత్యేక అవకాశాన్ని దక్కించుకున్నాడు.

ఈ టాస్క్‌లో త్రిగుణ్, అమన్ మధ్య గతంలో జరిగిన వివాదం మరోసారి తెరపైకి వచ్చింది. గతంలో అమన్ తన ఫొటోను త్రిగుణ్ చించేశాడని ఆరోపించగా, ఈసారి త్రిగుణ్ అతడికి గట్టి సమాధానం ఇచ్చాడు. అమన్ కుటుంబ సభ్యులను కలిసే అవకాశాన్ని కోల్పోయేలా చేశాడు. ఈ సందర్భంగా భావోద్వేగానికి గురైన త్రిగుణ్.. ‘‘మీ ఇంట్లో ఒక ముద్ద తిన్నాను. అలాంటప్పుడు నేను నీ ఫొటో చించుతానని ఎలా అనుకుంటావ్?’’ అంటూ అమన్‌ను ప్రశ్నించాడు. మరోవైపు నరేష్, దేబ్జానీ, నీతూ మధ్య జరిగిన బాస్కెట్ టాస్క్ కూడా ఆసక్తికరంగా సాగింది. తొలుత నరేష్ ఆధిక్యం కనబరిచినా, రంగులను సరైన క్రమంలో అమర్చే సమయంలో గందరగోళానికి గురయ్యాడు. నీతూ ఫిజికల్ గేమ్‌తో అతడి ఆటను అడ్డుకునేందుకు ప్రయత్నించడంతో నరేష్ ఆగ్రహానికి గురయ్యాడు. ఇద్దరూ ఒకరినొకరు అడ్డుకోవడంతో వారి ఆట దెబ్బతినగా, దేబ్జానీ ఈ అవకాశాన్ని సద్వినియోగం చేసుకుని విజయం సాధించింది. మొత్తంగా ఈ టాస్క్ హౌస్‌లో కొత్త వివాదాలకు దారితీసింది.