90 ఏళ్ల నాటి విమానయాన నిబంధనలకు ముగింపు.. కొత్త రూల్స్ తీసుకొచ్చిన కేంద్రం

దేశ పౌర విమానయాన రంగంలో కీలక సంస్కరణలకు కేంద్ర ప్రభుత్వం శ్రీకారం చుట్టింది. దాదాపు 90 ఏళ్లుగా అమల్లో ఉన్న 1937 నాటి ఎయిర్‌క్రాఫ్ట్ రూల్స్ స్థానంలో ‘భారతీయ వాయుయాన్ నియమ్-2026’ పేరుతో కొత్త నిబంధనలను తీసుకొచ్చింది. ఇవి 2027 జనవరి 1 నుంచి అమల్లోకి రానున్నాయి. వేగంగా విస్తరిస్తున్న విమానయాన రంగ అవసరాలకు అనుగుణంగా ఈ నిబంధనలను రూపొందించారు. విమానాల డిజైన్, సర్టిఫికేషన్‌కు స్పష్టమైన విధానాన్ని ఏర్పాటు చేయడంతో పాటు, విమానాల విడిభాగాల తయారీకి కూడా అనుమతులు కల్పించారు. ఒక విమానాన్ని పలువురు కలిసి కొనుగోలు చేసేందుకు వీలు కల్పించే ఫ్రాక్షనల్ ఓనర్‌షిప్ విధానాన్ని ప్రవేశపెట్టారు. ఐడీఈఆర్ఏ విధానం ద్వారా విమానాల లీజింగ్, డీరిజిస్ట్రేషన్ ప్రక్రియలను సులభతరం చేయనున్నారు. దీనివల్ల విమానాల కొనుగోలు, లీజింగ్ ఖర్చులు తగ్గే అవకాశం ఉంది.

విమానయాన సంస్థల వాణిజ్య ప్రయోజనాలు, ప్రయాణికుల సంక్షేమం మధ్య సమతుల్యత సాధించడంతో పాటు విమాన ఛార్జీలు, ఇతర రుసుముల్లో పారదర్శకత పెంచడం ఈ నిబంధనల ప్రధాన లక్ష్యం. అసాధారణ పరిస్థితుల్లో కేంద్ర ప్రభుత్వం నేరుగా జోక్యం చేసుకునేందుకు కూడా వీలు కల్పించారు. మొత్తం ఎనిమిది అధ్యాయాలు, ఆరు షెడ్యూళ్లు, 220 నిబంధనలతో కొత్త విధానాన్ని రూపొందించారు. డైరెక్టరేట్ జనరల్ ఆఫ్ సివిల్ ఏవియేషన్ (డీజీసీఏ)కు అదనపు అధికారాలు కల్పించారు. భారత్‌లో రూపొందించిన విమానాలు, ఇంజిన్లు, ప్రొపెల్లర్లకు టైప్ సర్టిఫికెట్లు జారీ చేసే అధికారం కల్పించారు. విమాన భద్రతకు ముప్పు ఏర్పడినప్పుడు తక్షణ ఆదేశాలు జారీ చేయవచ్చు. పైలట్లు, ఫ్లైట్ ఇంజినీర్లతో సహా 23 రకాల లైసెన్సులు, రేటింగ్‌లకు సంబంధించిన అర్హతలు, వైద్య ప్రమాణాలు, శిక్షణ, అనుభవ నిబంధనలను కూడా స్పష్టంగా నిర్దేశించారు. స్టూడెంట్ పైలట్ల నుంచి ఎయిర్‌లైన్ ట్రాన్స్‌పోర్ట్ పైలట్ల వరకు ఈ నిబంధనలు వర్తించనున్నాయి.