గ్రీన్ కార్డు కొత్త నిబంధనలపై అమెరికాలో నిరసనలు

అమెరికాలో తాత్కాలిక వీసాలపై నివసిస్తున్న విదేశీయులు స్వదేశాలకు వెళ్లి గ్రీన్ కార్డు ప్రక్రియ పూర్తి చేయాలన్న ట్రంప్ ప్రభుత్వ నిర్ణయంపై తీవ్ర ఆందోళనలు వ్యక్తమవుతున్నాయి. ఈ కొత్త నిబంధనలు ముఖ్యంగా భారతీయులపై భారీ ప్రభావం చూపే అవకాశముందని న్యాయ నిపుణులు, రాజకీయ నాయకులు హెచ్చరిస్తున్నారు. చట్టబద్ధంగా దరఖాస్తు చేసిన వారిపైనా పూర్తి విచక్షణాధికారాన్ని అధికారులకు ఇవ్వడం సరైన విధానం కాదని విమర్శలు వెల్లువెత్తుతున్నాయి. అమెరికాలో నివసిస్తున్న దాదాపు 12 లక్షల భారతీయ కుటుంబాలు ఈ నిర్ణయంతో ప్రభావితమయ్యే అవకాశముందని అంచనా వేస్తున్నారు.

డెమోక్రటిక్ పార్టీ నేతలు ఈ నిర్ణయాన్ని తీవ్రంగా వ్యతిరేకిస్తూ, మెమోను వెనక్కి తీసుకునే వరకు పోరాటం కొనసాగిస్తామని స్పష్టం చేశారు. మాజీ శ్వేతసౌధ సలహాదారు అజయ్ భూటోరియా మాట్లాడుతూ, ఎన్నో ఏళ్లుగా చట్టాలను గౌరవిస్తూ గ్రీన్ కార్డు కోసం ఎదురుచూస్తున్న వలసదారులకు ఇది పెద్ద దెబ్బ అని పేర్కొన్నారు. అమెరికాలో ఉద్యోగాలు చేస్తున్న నర్సులు, ఉపాధ్యాయులు, ఇంజినీర్లు, వ్యవసాయ కార్మికుల వంటి వేలాది మంది ఈ నిర్ణయంతో ఇబ్బందులు ఎదుర్కొనే పరిస్థితి ఏర్పడిందని అభిప్రాయాలు వ్యక్తమవుతున్నాయి.

హెచ్-1బీ, ఎల్-1 వీసాదారులకు ఈ కొత్త నిబంధనలు మరింత కఠినతరంగా మారనున్నాయి. కేవలం అమెరికాలో దీర్ఘకాలంగా నివసించడం మాత్రమే గ్రీన్ కార్డు దరఖాస్తుకు సరిపోదని అధికారులు స్పష్టం చేశారు. పన్నుల చరిత్ర, కుటుంబ పరిస్థితులు, ఉద్యోగ అనుభవం వంటి అంశాలను పరిశీలించి మాత్రమే నిర్ణయం తీసుకోనున్నారు. ఎఫ్-1 విద్యార్థి వీసాదారులు కూడా ప్రత్యేక పరిస్థితుల్లో మాత్రమే అర్హత పొందే అవకాశం ఉంది. ఈ నిర్ణయంపై త్వరలోనే కోర్టుల్లో సవాళ్లు ఎదురయ్యే అవకాశం ఉందని న్యాయ నిపుణులు చెబుతున్నారు.