బిమాన్‌ బంగ్లాదేశ్‌ ఎయిర్‌లైన్స్‌ విమానంలో ప్రయాణికుల మధ్య ఘర్షణ...

లండన్‌ నుంచి ఢాకాకు వెళ్తున్న బిమాన్‌ బంగ్లాదేశ్‌ ఎయిర్‌లైన్స్‌ విమానంలో ఇద్దరు ప్రయాణికుల మధ్య ఘర్షణ చోటుచేసుకుంది. ఈ ఘటనకు సంబంధించిన వీడియో సోషల్‌ మీడియాలో వైరల్‌గా మారింది. విమాన ప్రయాణ సమయంలో ఇద్దరి మధ్య మొదలైన వాగ్వాదం కాస్తా భౌతిక దాడికి దారితీసింది. ఇద్దరూ పరస్పరం ముష్టిఘాతాలు చేసుకోవడంతో ఓ ప్రయాణికుడి షర్టు చిరిగిపోయింది. దీంతో ఇతర ప్రయాణికులు ఆందోళనకు గురయ్యారు. క్యాబిన్‌ సిబ్బంది, తోటి ప్రయాణికులు జోక్యం చేసుకుని గొడవను అదుపులోకి తీసుకొచ్చారు.

అయితే ఈ ఘర్షణకు అసలు కారణం ఏమిటన్నది ఇంకా తెలియరాలేదు. విమానంలో ప్రయాణికుల భద్రతపై ఈ ఘటన ఆందోళన కలిగించిందని నెటిజన్లు పేర్కొంటున్నారు. ఘటనపై విచారణ చేపట్టనున్నట్లు బిమాన్‌ బంగ్లాదేశ్‌ ఎయిర్‌లైన్స్‌ జనరల్‌ మేనేజర్‌ మహబూబుద్దీన్‌ అహ్మద్‌ తెలిపారు. ఘటనకు సంబంధించిన మరిన్ని వివరాలు, తదుపరి చర్యలపై స్పష్టత రావాల్సి ఉంది.