హైదరాబాద్‌ను పరిశుభ్ర, ట్రాఫిక్ రహిత నగరంగా తీర్చిదిద్దాలి: సీఎం రేవంత్ రెడ్డి

హైదరాబాద్‌ను పరిశుభ్రమైన నగరంగా, ట్రాఫిక్ రహిత నగరంగా తీర్చిదిద్దేందుకు సమగ్ర చర్యలు చేపట్టాలని ముఖ్యమంత్రి ఎ. రేవంత్ రెడ్డి అధికారులను ఆదేశించారు. సోమవారం జూబ్లీహిల్స్‌లోని తన నివాసంలో మున్సిపల్ అధికారులతో నిర్వహించిన సమీక్షా సమావేశంలో నగర పరిశుభ్రత, చెత్త సేకరణ, గ్రీన్ వాటర్ సరఫరా, ట్రాఫిక్ నియంత్రణ వంటి అంశాలపై చర్చించారు. నగరంలో ఎక్కడా చెత్త పేరుకుపోకుండా నిరంతరం పర్యవేక్షించాలని, ప్రతిరోజూ ఇంటింటికీ చెత్త సేకరణ జరిగేలా చర్యలు తీసుకోవాలని సూచించారు. విధుల్లో నిర్లక్ష్యం వహించే వారిపై కఠిన చర్యలు తీసుకోవాలని, నిర్మాణ వ్యర్థాల తరలింపునకు ప్రత్యేక ఏర్పాట్లు చేయాలని ఆదేశించారు. పారిశ్రామిక ప్రాంతాల్లో చెత్త సేకరణ కోసం పారిశ్రామిక ప్రాంతాల స్థానిక సంస్థల అధికారులతో సమన్వయం చేసుకోవాలని తెలిపారు.

నిర్మాణ పనులు, పార్కుల నిర్వహణ, పచ్చదనం అభివృద్ధి, తోటల పెంపకం వంటి అవసరాలకు మురుగునీటి శుద్ధి కేంద్రాల్లో శుద్ధి చేసిన నీటిని వినియోగించేలా గ్రీన్ వాటర్ ట్యాంకర్లపై అవగాహన కల్పించాలని సీఎం సూచించారు. తాగునీటికి బదులుగా శుద్ధి చేసిన నీటిని ఉపయోగించడం ద్వారా నీటిని ఆదా చేయవచ్చని పేర్కొన్నారు. తొలి విడతలో 19 మురుగునీటి శుద్ధి కేంద్రాల నుంచి 28 గ్రీన్ వాటర్ ట్యాంకర్ల ద్వారా సేవలు అందుబాటులోకి తెచ్చినట్లు గుర్తుచేశారు. జీహెచ్‌ఎంసీతో పాటు ఇతర మున్సిపల్ కార్పొరేషన్ల పరిధిలోనూ ఈ సేవలను విస్తరించాలని సూచించారు. నగరంలో ట్రాఫిక్ సమస్యలను తగ్గించేందుకు అవసరమైన చోట్ల అండర్‌పాస్‌లు, ఎలివేటెడ్ కారిడార్ల నిర్మాణానికి ప్రణాళికలు సిద్ధం చేయాలని, సాధ్యమైనంత వరకు సిగ్నళ్ల వద్ద వాహనాలు నిలిచిపోకుండా రాకపోకలు సజావుగా సాగేలా చర్యలు తీసుకోవాలని ఆదేశించారు. ఈ సమావేశంలో ఎంపీ వేం నరేందర్ రెడ్డి, సీఎం కార్యదర్శి మాణిక్ రాజ్, హెచ్‌ఎండీఏ కమిషనర్ సర్ఫరాజ్ అహ్మద్, సైబరాబాద్ మున్సిపల్ కార్పొరేషన్ కమిషనర్ జి. సృజన తదితరులు పాల్గొన్నారు.