చివరి వ్యక్తికి సాయం అందే వరకు విశ్రమించేది లేదు.. చంద్రబాబు కీలక ఆదేశాలు

అర్నబ్ తుపాను ప్రభావిత ప్రాంతాల్లో సాధారణ పరిస్థితులను పునరుద్ధరించేందుకు ఆంధ్రప్రదేశ్ ప్రభుత్వం చర్యలను ముమ్మరం చేసింది. ముఖ్యమంత్రి చంద్రబాబు నాయుడు నాలుగు రోజులుగా సహాయక, పునరుద్ధరణ పనులను నిరంతరం పర్యవేక్షిస్తున్నారు. టెలీకాన్ఫరెన్స్‌లు, వీడియో సమావేశాలు, క్షేత్రస్థాయి పర్యటనల ద్వారా అధికారులకు దిశానిర్దేశం చేస్తున్నారు. శుక్రవారం ఉదయం మరోసారి సమీక్ష నిర్వహించిన ఆయన.. విద్యుత్, రహదారులు, మొబైల్ సమాచార వ్యవస్థల పునరుద్ధరణ పనుల పురోగతిని తెలుసుకున్నారు. చివరి వ్యక్తికి సహాయం అందే వరకు, ప్రజల సమస్యలు పూర్తిగా పరిష్కారమయ్యే వరకు అధికారులు ఇదే వేగంతో పనిచేయాలని స్పష్టం చేశారు.

తుపాను కారణంగా విద్యుత్ సరఫరా నిలిచిపోయిన 5,404 గ్రామాల్లో 4,881 గ్రామాలకు విద్యుత్ పునరుద్ధరించారు. ప్రభావితమైన 552 సబ్‌స్టేషన్లలో 513 తిరిగి పనిచేస్తున్నాయి. దెబ్బతిన్న 1,045 మొబైల్ టవర్లలో 661 పునరుద్ధరించారు. రహదారులపై కూలిన 2,270 చెట్లను తొలగించగా, అంతరాయం ఏర్పడిన 137 ప్రాంతాల్లో 119 చోట్ల రాకపోకలను పునరుద్ధరించారు. మరోవైపు, 16 జిల్లాల్లో 3.52 లక్షల హెక్టార్ల వ్యవసాయ పంటలు, 23,211 హెక్టార్ల ఉద్యాన పంటలు దెబ్బతిన్నాయి. పంట నష్టాన్ని అంచనా వేసేందుకు కేంద్ర బృందాలు రాష్ట్రానికి రానున్నాయి. అక్టోబర్ 26 నుంచి 29 వరకు కురిసిన వర్షాలతో రాష్ట్రానికి సుమారు 380 టీఎంసీల నీరు చేరినట్లు అధికారులు అంచనా వేశారు.