నేపాల్‌ విపత్తుపై మోదీ, ముర్ము సానుభూతి

నేపాల్‌లో ఆకస్మిక వరదలు, ప్రకృతి విపత్తుపై రాష్ట్రపతి ద్రౌపది ముర్ము, ప్రధాని నరేంద్ర మోదీ తీవ్ర సంతాపం వ్యక్తం చేశారు. రాష్ట్రపతి ముర్ము నేపాల్ అధ్యక్షుడు రామచంద్ర పౌడెల్‌తో ఫోన్‌లో మాట్లాడి, ఈ క్లిష్ట సమయంలో భారత్‌ నేపాల్‌కు అండగా ఉంటుందని తెలిపారు. ప్రధాని మోదీ కూడా నేపాల్ ప్రధాని బాలేంద్ర షాతో మాట్లాడి తీవ్ర సానుభూతి వ్యక్తం చేశారు. కష్టకాలంలో నేపాల్ ప్రజలకు భారత ప్రజలు అండగా నిలుస్తారని, అవసరమైన అన్ని రకాల మానవతా సహాయం అందించేందుకు భారత్ సిద్ధంగా ఉందని హామీ ఇచ్చారు.

వరదల్లో చిక్కుకున్న భారతీయులకు సహాయం అందించేందుకు ఖాట్మండులోని భారత రాయబార కార్యాలయం అత్యవసర హెల్ప్‌లైన్ నంబర్లను ఏర్పాటు చేసింది. పర్యాటకులు నేపాల్ టూరిజం బోర్డు సూచించిన అత్యవసర నంబర్లను కూడా సంప్రదించవచ్చు. భారత విదేశాంగ మంత్రిత్వ శాఖ, ఖాట్మండులోని భారత రాయబార కార్యాలయం నేపాల్ అధికారులతో నిరంతరం సమన్వయం చేసుకుంటూ, చిక్కుకున్న భారతీయులను రక్షించేందుకు చర్యలు చేపడుతున్నాయి.