నీట్ ర్యాంకర్‌కు కేటీఆర్‌ ఆర్థిక సాయం

వరంగల్‌ జిల్లా వర్ధన్నపేటకు చెందిన కొండేటి అఖీరా నీట్ లో ర్యాంకు సాధించి, మెదక్‌ జిల్లా పటాన్‌చెరులోని ఓ ప్రైవేటు వైద్య కళాశాలలో ఎంబీబీఎస్ సీటు పొందారు. అయితే కళాశాలలో చేరేందుకు సుమారు రూ.2 లక్షల వరకు ఫీజు చెల్లించాల్సి ఉండగా, ఆర్థిక ఇబ్బందుల కారణంగా ఆమెకు అడ్మిషన్‌ విషయంలో సమస్య ఎదురైంది. ఈ విషయంపై ఈనాడు ‘డాక్టరు అవ్వాలని ఉంది’ అనే శీర్షికతో సెప్టెంబర్‌ 19న వరంగల్‌ జిల్లా పేజీలో కథనం ప్రచురించింది. ఈ కథనం ద్వారా అఖీరా పరిస్థితిని తెలుసుకున్న మాజీ మంత్రి, బీఆర్ఎస్ వర్కింగ్‌ ప్రెసిడెంట్‌ కేటీఆర్‌ ఆమెకు సాయం చేసేందుకు ముందుకొచ్చారు.

సోమవారం తెలంగాణ భవన్‌లో అఖీరా కుటుంబ సభ్యులు కేటీఆర్‌ను కలిశారు. ఈ సందర్భంగా అఖీరాకు రూ.2 లక్షల చెక్కును కేటీఆర్‌ అందజేశారు. వైద్య విద్య పూర్తయ్యే వరకు అండగా ఉంటామని ఆమె కుటుంబానికి భరోసా ఇచ్చారు. ఆర్థిక ఇబ్బందుల మధ్య వైద్య విద్యను కొనసాగించేందుకు కేటీఆర్‌ అందించిన సాయం అఖీరా కుటుంబానికి ఊరటనిచ్చింది.