సాగునీటి ప్రాజెక్టులపై రైతుల అభిప్రాయాలను అడిగి తెలుసుకున్న కేసీఆర్

కోటి ఎకరాలకు సాగునీరు అందించాలనే లక్ష్యంతో నిర్మించిన ప్రాజెక్టులను కాంగ్రెస్‌ ప్రభుత్వం నిర్లక్ష్యం చేస్తోందని మాజీ ముఖ్యమంత్రి, భారాస అధినేత కేసీఆర్‌ ఆరోపించారు. ఈ ప్రాజెక్టుల నిర్వహణ, సాగునీటి సరఫరాపై రైతులు ఏమనుకుంటున్నారో ఆయన ఆరా తీశారు. జయశంకర్‌ భూపాలపల్లి జిల్లా మేడిగడ్డ నుంచి కొండపోచమ్మ సాగర్‌ వరకు పెద్దపల్లి, గోదావరిఖని పట్టణాల భారాస అధ్యక్షులు ఉప్పు రాజ్‌కుమార్, బొడ్డు రవీందర్‌ ఆధ్వర్యంలో తొమ్మిది మంది నాయకులు సుమారు 400 కిలోమీటర్లు సైకిల్‌ యాత్ర చేపట్టారు. బుధవారం సాయంత్రం సిద్దిపేట జిల్లా మర్కూక్‌ మండలం ఎర్రవల్లిలోని వ్యవసాయ క్షేత్రంలో కేసీఆర్‌ను కలిశారు. యాత్రగా వచ్చిన నాయకులను ఆయన సన్మానించి అభినందించారు.

ఈ సందర్భంగా వివిధ గ్రామాల్లో రైతులతో మాట్లాడినప్పుడు వారు వెల్లడించిన అభిప్రాయాలను నాయకులు కేసీఆర్‌కు వివరించారు. జలాశయాల నుంచి సాగునీరు అందడం లేదని, విద్యుత్‌ సరఫరా సరిగా లేదని, యూరియా కొరత కూడా వేధిస్తోందని రైతులు ఆవేదన వ్యక్తం చేస్తున్నట్లు తెలిపారు. కాంగ్రెస్‌ ప్రభుత్వం సాగునీటి ప్రాజెక్టులను పట్టించుకోవడం లేదని, రానున్న ఎన్నికల్లో ఆ పార్టీకి తగిన గుణపాఠం చెబుతామని రైతులు అంటున్నట్లు వివరించారు. పార్టీ అభివృద్ధికి అందరూ సమష్టిగా కృషి చేయాలని, భవిష్యత్తులో భారాస ప్రభుత్వం అధికారంలోకి వస్తుందని కేసీఆర్‌ చెప్పినట్లు నాయకులు వెల్లడించారు. ఈ యాత్రలో కాశిపాక వాసు, ఆరెపల్లి సురేశ్, ముత్యం లక్ష్మణ్‌గౌడ్, పరుపల్లి అనిల్, మేకల నవీన్, గుండబోయిన శ్రీనివాస్, మహేందర్‌ తదితరులు పాల్గొన్నారు.