‘ఇండియా’ కూటమి అవకాశవాద రాజకీయాలు చేస్తోంది- కె.లక్ష్మణ్‌

ఎన్నికల్లో ప్రజల మద్దతు పొందలేకపోవడంతోనే ‘ఇండియా’ కూటమి రాజ్యాంగబద్ధమైన ఎన్నికల సంఘం, న్యాయ వ్యవస్థలపై దాడికి దిగుతోందని రాజ్యసభ సభ్యుడు కె.లక్ష్మణ్‌ ఆరోపించారు. సోమవారం బీజేపీ రాష్ట్ర కార్యాలయంలో నిర్వహించిన మీడియా సమావేశంలో ఆయన మాట్లాడుతూ, ఎన్నికల ప్రక్రియపై విపక్ష కూటమి వైఖరిని విమర్శించారు. దేశవ్యాప్తంగా అక్రమ ఓటర్ల జాబితాలను ప్రక్షాళన చేయాలని గతంలో కాంగ్రెస్‌ నేతలే ఎన్నికల సంఘాన్ని కోరారని గుర్తుచేశారు. ఇప్పుడు ఓటర్ల జాబితా ప్రత్యేక సమగ్ర సవరణ ప్రక్రియ చేపడుతుంటే ప్రజాస్వామ్యానికి ప్రమాదం ఏర్పడిందంటూ ఆందోళనలు చేయడం అవకాశవాద రాజకీయాలకు నిదర్శనమని వ్యాఖ్యానించారు.

గతంలో వివిధ రాష్ట్రాల్లో బోగస్‌ ఓట్లపై కాంగ్రెస్‌, ఇతర ప్రతిపక్ష నేతలు చేసిన వ్యాఖ్యలను కె.లక్ష్మణ్‌ ఈ సందర్భంగా ప్రస్తావించారు. మధ్యప్రదేశ్‌లో 60 లక్షల బోగస్‌ ఓట్లు ఉన్నాయని కమల్‌నాథ్‌, గుజరాత్‌లో 40 లక్షల దొంగ ఓట్లు ఉన్నాయని శక్తిసింగ్‌ గోహిల్‌ ఆరోపించినట్లు తెలిపారు. అలాగే, దిల్లీలో 11 లక్షల బోగస్‌ ఓట్లను తొలగించాలని అరవింద్‌ కేజ్రీవాల్‌ గతంలో ఎన్నికల సంఘానికి వినతులు అందజేశారని పేర్కొన్నారు. గతంలో ఓటర్ల జాబితాల ప్రక్షాళనను కోరిన నేతలే ఇప్పుడు ప్రత్యేక సమగ్ర సవరణ ప్రక్రియను వ్యతిరేకించడం విరుద్ధమైన వైఖరని ఆయన విమర్శించారు.