భూటాన్‌లో అద్భుత ఘనత.. ఒకే రోజులో బౌద్ధ స్థూపాల నిర్మాణం

భూటాన్‌లోని గెలెఫు పట్టణంలో ఆదివారం అరుదైన ఘనత నమోదైంది. దేశవిదేశాల నుంచి వచ్చిన సుమారు 2 లక్షల మంది వాలంటీర్లు ఒక్క రోజులోనే 108 బౌద్ధ స్థూపాలను నిర్మించి చరిత్ర సృష్టించారు. భూటాన్‌ రాజు జిగ్మే వాంగ్‌చుక్‌ ఆలోచనతో రూపుదిద్దుకుంటున్న మైండ్‌ఫుల్‌నెస్‌ సిటీ ప్రాజెక్టులో భాగంగా ఈ కార్యక్రమాన్ని చేపట్టారు. ఈ నగరానికి డెన్మార్క్‌కు చెందిన వాస్తుశిల్పులు రూపకల్పన చేశారు.

భారత్‌ సరిహద్దుకు సమీపంలో ఉన్న గెలెఫు పట్టణ జనాభా కేవలం 10 వేల మంది మాత్రమే. ఈ పట్టణంలో నిర్మించిన ఒక్కో బౌద్ధ స్థూపం 50 అడుగుల ఎత్తుతో ఉండగా, వాటి మధ్య 354 అడుగుల దూరం ఉండేలా నిర్మాణాలు చేపట్టారు. ఈ స్థూపాల నిర్మాణం కోసం నెలల తరబడి ప్రణాళికలు, ఏర్పాట్లు చేశారు. అనంతరం వేలాది మంది వాలంటీర్ల సమన్వయంతో ఒక్క రోజులోనే 108 స్థూపాల నిర్మాణాన్ని పూర్తి చేశారు.