బెంగళూరు–ముంబయి మధ్య వందేభారత్‌ స్లీపర్‌ రైలు ప్రారంభం

బెంగళూరు–ముంబయి మధ్య ప్రయాణించే వందేభారత్‌ స్లీపర్‌ రైలును కేంద్ర రైల్వే మంత్రి అశ్వినీ వైష్ణవ్‌ ఆదివారం ప్రారంభించారు. బెంగళూరులోని సర్‌ ఎం. విశ్వేశ్వరయ్య టెర్మినల్‌ నుంచి ఈ రైలు బయలుదేరి హిందూపురం, ధర్మవరం, అనంతపురం, గుంతకల్లు, హుబ్బళ్లి, సోలాపూర్‌, పుణె, లోనావాలా స్టేషన్ల మీదుగా ముంబయికి చేరుకోనుంది. ఈ రైలు ప్రారంభ కార్యక్రమంలో కేంద్ర మంత్రులు ప్రహ్లాద్‌ జోషి, సోమన్న, హెచ్‌డీ కుమారస్వామి, శోభా కరంద్లాజే, ఎంపీలు డాక్టర్‌ మంజునాథ్‌, తేజస్వి సూర్య, పీసీ మోహన్‌ తదితరులు పాల్గొన్నారు.

సోమవారం మినహా మిగిలిన రోజుల్లో బెంగళూరు నుంచి రాత్రి 7.45 గంటలకు రైలు బయలుదేరి మరుసటి రోజు ఉదయం 11.55 గంటలకు ముంబయికి చేరుకుంటుంది. తిరుగు ప్రయాణంలో ముంబయి నుంచి రాత్రి 8.10 గంటలకు బయలుదేరి మరుసటి రోజు మధ్యాహ్నం 12.20 గంటలకు బెంగళూరుకు చేరుకుంటుంది. ఈ రైలు అందుబాటులోకి రావడంతో బెంగళూరు, ముంబయి మధ్య ప్రయాణించే వారికి రాత్రిపూట ప్రయాణ సౌకర్యం కలగనుంది. మార్గమధ్యంలోని పలు పట్టణాల ప్రయాణికులకు కూడా ఈ సేవలు ఉపయోగపడనున్నాయి.