ఓట్లు దొంగిలించం.. ప్రజల మనసులు గెలుస్తాం: హిమంత బిశ్వ శర్మ

బీజేపీ ఓట్లను చోరీ చేయదని, ప్రజల మనసులను గెలుచుకుంటుందని అస్సాం ముఖ్యమంత్రి, బీజేపీ నేత హిమంత బిశ్వ శర్మ అన్నారు. హిమాచల్‌ప్రదేశ్‌ రాజధాని శిమ్లాలో ‘ప్రజాస్వామ్యాన్ని కాపాడండి – అరాచకాన్ని పారదోలండి’ అనే నినాదంతో నిర్వహించిన పాదయాత్రలో ఆయన పాల్గొన్నారు. ఈ సందర్భంగా కాంగ్రెస్‌ అగ్రనేత రాహుల్‌ గాంధీతో పాటు హిమాచల్‌ప్రదేశ్‌లోని కాంగ్రెస్‌ ప్రభుత్వంపై విమర్శలు చేశారు. ఈవీఎంలతో జరిగిన ఎన్నికల్లోనే కాకుండా, ఇటీవల బ్యాలెట్‌ పేపర్ల ద్వారా నిర్వహించిన పలు రాష్ట్రాల ఎమ్మెల్సీ ఎన్నికల్లోనూ కాంగ్రెస్‌ ఓటమి పాలైందని వ్యాఖ్యానించారు. ఈవీఎంల ద్వారానే హిమాచల్‌ప్రదేశ్‌లో అధికారంలోకి వచ్చిన కాంగ్రెస్‌.. ఇప్పుడు అదే ఎన్నికల విధానాన్ని ప్రశ్నిస్తూ నిరసనలు చేపట్టడం విడ్డూరంగా ఉందని విమర్శించారు.

కర్ణాటక, తెలంగాణ, హిమాచల్‌ప్రదేశ్‌ అసెంబ్లీ ఎన్నికల్లో గెలిచినప్పుడు కాంగ్రెస్‌ నేతలు ఈవీఎంలపై అభ్యంతరాలు వ్యక్తం చేయలేదని, బీజేపీ విజయం సాధించినప్పుడే ఎన్నికల సంఘం, ఎన్నికల ప్రక్రియను ప్రశ్నిస్తున్నారని హిమంత ఆరోపించారు. ప్రజాస్వామ్య వ్యవస్థ సమగ్రతను కాపాడేందుకు కచ్చితమైన ఓటరు జాబితాలు అవసరమని పేర్కొన్నారు. దేశంలో అస్థిరత సృష్టించేందుకు బంగ్లాదేశ్‌, నేపాల్‌లోని రాజకీయ పరిణామాలను కాంగ్రెస్‌ ఉపయోగించుకుంటోందని విమర్శించారు. భారత్‌ ప్రజాస్వామ్య దేశమని, ఇక్కడ ప్రభుత్వాలు రాజకీయ బెదిరింపులు లేదా వీధి ఆందోళనల ద్వారా కాకుండా ప్రజల ఓట్లతోనే మారుతాయని అన్నారు. హిమాచల్‌ప్రదేశ్‌లో ఐదేళ్లలో యువతకు ఐదు లక్షల ఉద్యోగాలు కల్పిస్తామని హామీ ఇచ్చి కాంగ్రెస్‌ ప్రభుత్వం విఫలమైందని హిమంత బిశ్వ శర్మ ఆరోపించారు.