బక్రీద్ వేళ.. 40 శాతం పెరిగిన మేకల ధరలు

ఈద్ అల్-అద్హా (బక్రీద్, ఈ నెల 28) పండుగ సమీపిస్తున్న నేపథ్యంలో దేశవ్యాప్తంగా బకరా మార్కెట్లలో మేకల ధరలు భారీగా పెరిగాయి. పెరిగిన రవాణా ఖర్చులు, మేత ధరల భారంతో పాటు పండుగ డిమాండ్ అధికంగా ఉండటం వల్ల గత ఏడాదితో పోలిస్తే ఈ ఏడాది ధరలు 20 శాతం నుంచి 40 శాతం వరకు పెరిగినట్లు వ్యాపారులు చెబుతున్నారు. పండుగ సమీపిస్తుండటంతో కొనుగోళ్లు పెరిగి మార్కెట్లలో రద్దీ ఎక్కువైంది.

ప్రస్తుతం 20-25 కిలోల బరువున్న చిన్న మేకలు ₹11,000 నుంచి ₹25,000 మధ్య లభిస్తున్నాయి. అలాగే 30-50 కిలోల బరువున్న మధ్య తరహా మేకలు ₹20,000 నుంచి ₹50,000 వరకు ధర పలుకుతున్నాయి. ఇంకా పండుగకు కొద్ది రోజులు మాత్రమే మిగిలి ఉండటంతో డిమాండ్ కొనసాగుతుండగా ధరలు ఇలానే ఎక్కువగా ఉండే అవకాశం ఉందని నిపుణులు అంచనా వేస్తున్నారు.