హోటళ్లలో అపరిశుభ్రత.. రంగంలోకి దిగిన ఫుడ్ సేఫ్టీ అధికారులు

హైదరాబాద్‌–విజయవాడ జాతీయ రహదారిపై కొయ్యలగూడెం నుంచి కోదాడ మధ్య ఉన్న పలు హోటళ్లలో తెలంగాణ సేఫ్ ఫుడ్ విభాగం, ఎన్‌ఫోర్స్‌మెంట్ అధికారులు ఈ రోజు ఉదయం 11 గంటల నుంచి తనిఖీలు నిర్వహించారు. ఈ తనిఖీల్లో హోటళ్ల నిల్వ గదుల్లో బొద్దింకలు, ఎలుకలు సంచరిస్తున్నట్లు గుర్తించారు. అపరిశుభ్రమైన వంటగదుల్లో ఆహార పదార్థాలను తయారు చేస్తున్నట్లు అధికారులు గమనించారు. వంటకు ఉపయోగించే పప్పు ధాన్యాలకు పురుగులు పట్టి ఉండటాన్ని గుర్తించారు. అలాగే మాంసాహార పదార్థాలు, పాల ఉత్పత్తులను సరైన ఉష్ణోగ్రత వద్ద, తగిన పద్ధతుల్లో నిల్వ చేయకపోవడం, గత రోజు వండిన ఆహార పదార్థాలను నిల్వ ఉంచడం వంటి ఉల్లంఘనలు వెలుగులోకి వచ్చాయి.

కొన్ని హోటళ్లు గడువు ముగిసిన భారత ఆహార భద్రత, ప్రమాణాల ప్రాధికార సంస్థ (ఎఫ్ఎస్ఎస్ఏఐ) లైసెన్స్‌తోనే కార్యకలాపాలు నిర్వహిస్తున్నట్లు అధికారులు గుర్తించారు. తనిఖీల్లో బయటపడిన ఉల్లంఘనల ఆధారంగా కొన్ని హోటళ్లను మూసివేయడంతో పాటు, మరికొన్నింటికి వివరణ కోరుతూ నోటీసులు జారీ చేయనున్నారు. నిబంధనలను పాటించని ఇతర హోటళ్లకు లోపాలను సరిదిద్దుకోవాలని సూచిస్తూ మెరుగుదల నోటీసులు ఇవ్వనున్నారు. ఆహార భద్రత ప్రమాణాలను పాటించకుండా ప్రజలకు ఆహారం అందిస్తున్న హోటళ్లపై అధికారులు చర్యలు చేపట్టారు.