ఇండిగో విమానంలో ఫ్యామిలీ విందు..

ఇండిగో విమానంలో ఓ కుటుంబం సమోసాలు, ధోక్లా, థేప్లా, నమ్కీన్ వంటి పలు రకాల స్నాక్స్‌తో చిన్నపాటి విందు చేసుకున్న వీడియో సోషల్ మీడియాలో వైరల్‌గా మారింది. వీడియోలో ఓ మహిళ డిస్పోజబుల్ ప్లేట్లలో ఆహారాన్ని వడ్డించగా, కుటుంబ సభ్యులు కలిసి స్నాక్స్ తింటూ కనిపించారు. కొంతమంది యువతులు అదే సమయంలో ప్రెస్ ఆన్ నెయిల్స్ వేసుకోవడం కూడా కనిపించింది. భోజనం పూర్తయ్యాక ఉపయోగించిన ప్లేట్లు, ఇతర వ్యర్థాలను పెద్ద చెత్త సంచిలో సేకరించడంతో పరిశుభ్రత విషయంలో కుటుంబం జాగ్రత్తలు తీసుకున్నట్లు వీడియోలో కనిపించింది.

ఈ వీడియోపై నెటిజన్లు భిన్నాభిప్రాయాలు వ్యక్తం చేస్తున్నారు. సొంత ఆహారాన్ని విమానంలో తీసుకెళ్లి తినడంలో తప్పేమీ లేదని కొందరు కుటుంబానికి మద్దతు ఇవ్వగా, విమానం వంటి మూసివున్న ప్రదేశంలో వాసన ఎక్కువగా ఉండే ఆహారాన్ని తినడం వల్ల తోటి ప్రయాణికులకు అసౌకర్యం కలగవచ్చని మరికొందరు అభిప్రాయపడ్డారు. మరికొందరు ఈ అంశాన్ని ఏదైనా ప్రాంతం లేదా వర్గానికి ఆపాదించకుండా ప్రయాణికుల ప్రవర్తన, పరిశుభ్రత, ఇతరుల సౌకర్యం కోణంలో చూడాలని సూచించారు. దీంతో విమాన ప్రయాణంలో సొంత ఆహారం తీసుకెళ్లడం, తినే విధానం, వ్యర్థాల నిర్వహణపై సోషల్ మీడియాలో చర్చ మొదలైంది.