ముంబై ఎయిర్‌పోర్ట్ టెర్మినల్-1పై ఫడ్నవీస్ కీలక ప్రతిపాదన

ముంబై విమానాశ్రయంలోని టెర్మినల్-1 పునర్నిర్మాణానికి సంబంధించి మహారాష్ట్ర ముఖ్యమంత్రి దేవేంద్ర ఫడ్నవీస్ కీలక ప్రత్యామ్నాయ ప్రణాళికను ప్రతిపాదించారు. టెర్మినల్-1 అభివృద్ధి పనుల్లో భాగంగా 14 అంతర్జాతీయ విమానాలను నవీ ముంబై విమానాశ్రయానికి తరలించే ప్రతిపాదనను ఆయన వ్యతిరేకించారు. ఈ నిర్ణయం వల్ల ప్రయాణికులు, విమానయాన సంస్థలు ఇబ్బందులు ఎదుర్కొనే అవకాశం ఉందని అభిప్రాయపడ్డారు.

ప్రస్తుతం ఉన్న టెర్మినల్-1ను కూల్చివేసే ముందే దాని స్థానంలో కొత్త టెర్మినల్‌ను నిర్మించాలని ఫడ్నవీస్ సూచించారు. పాత టెర్మినల్ కార్యకలాపాలు కొనసాగుతుండగానే కొత్త నిర్మాణాన్ని పూర్తి చేయడం ద్వారా విమాన సర్వీసులకు అంతరాయం కలగకుండా చూడవచ్చని పేర్కొన్నారు. ఈ ప్రత్యామ్నాయ విధానం అమలు చేస్తే ప్రయాణికులు, విమానయాన సంస్థలపై అదనపు భారం తగ్గుతుందని ఆయన అభిప్రాయపడ్డారు.