సీఆర్‌పీఎఫ్‌, బీఎస్‌ఎఫ్‌లో ఎస్‌ఐ ఉద్యోగాలు.. నోటిఫికేషన్ విడుదల

కేంద్ర సాయుధ పోలీసు దళాల్లో సబ్‌-ఇన్‌స్పెక్టర్‌ (GD) పోస్టుల భర్తీకి బీఎస్‌ఎఫ్‌ నోటిఫికేషన్ విడుదల చేసింది. 2026 లిమిటెడ్ డిపార్ట్‌మెంటల్ కాంపిటేటివ్ ఎగ్జామినేషన్ (LDCE) ద్వారా ఈ నియామకాలు చేపట్టనున్నారు. మొత్తం 1,167 ఖాళీలను భర్తీ చేయనుండగా, సీఆర్‌పీఎఫ్‌లో 377, ఐటీబీపీలో 430, బీఎస్‌ఎఫ్‌లో 235, ఎస్‌ఎస్‌బీలో 125 పోస్టులు ఉన్నాయి. అర్హత కలిగిన పురుష, మహిళా సర్వీస్ అభ్యర్థులు ఆన్‌లైన్‌లో దరఖాస్తు చేసుకోవచ్చు.

నాలుగేళ్ల సర్వీసు పూర్తి చేసుకుని, డిగ్రీ అర్హత కలిగిన కానిస్టేబుళ్లు, హెడ్ కానిస్టేబుళ్లు, అసిస్టెంట్ సబ్‌-ఇన్‌స్పెక్టర్లు (ASI) ఈ పోస్టులకు దరఖాస్తు చేసుకునేందుకు అర్హులు. ఆన్‌లైన్ దరఖాస్తుల స్వీకరణ నవంబర్ 12న ప్రారంభమై డిసెంబర్ 31 వరకు కొనసాగుతుంది. ఆసక్తి, అర్హత కలిగిన సిబ్బంది నిర్ణీత గడువులోగా దరఖాస్తు ప్రక్రియను పూర్తి చేయాలి.