మొహంజోదారో ‘డాన్సింగ్ గర్ల్’ చిత్రం వివాదం

సింధు నాగరికత కాలానికి చెందిన ప్రపంచ ప్రసిద్ధ కాంస్య విగ్రహం ‘డాన్సింగ్ గర్ల్ ఆఫ్ మొహంజోదారో’ను ఎన్‌సీఈఆర్టీ 9వ తరగతి పాఠ్యపుస్తకంలో మార్పులు చేసి చూపించడంపై వివాదం చెలరేగింది. ఈ విగ్రహం భారతదేశంలో 4,500 సంవత్సరాల క్రితమే ఉన్న లోహశాస్త్ర నైపుణ్యం, కళాత్మకతకు నిదర్శనంగా భావిస్తారు.

సవరించిన చిత్రంలో మహిళ శరీరంలోని భాగాలను మాస్క్ చేయడం చరిత్రకారులు, నిపుణుల విమర్శలకు దారితీసింది. అయితే ఇదే చిత్రం 6వ తరగతి పాఠ్యపుస్తకంలో యథాతథంగా ప్రచురించడం అసమానతలపై ప్రశ్నలు రేకెత్తించింది.

తీవ్ర చర్చల అనంతరం ఎన్‌సీఈఆర్టీ వెనక్కి తగ్గి, 9వ తరగతి పాఠ్యపుస్తకంలో అసలు చిత్రాన్నే ముద్రించనున్నట్లు ప్రకటించింది. చారిత్రక అంశాలను మార్పులు చేయడం తగదని నిపుణులు సూచించారు.