ఇంట్లో నాగుపాముల కలకలం.. తవ్వుతుండగా బయటపడ్డ పాము గుడ్లు

ఉత్తరప్రదేశ్‌లోని బాగ్‌పత్‌ జిల్లాలో ఓ ఇంట్లో వరుసగా పాములు కనిపిస్తుండటంతో స్థానికులు తీవ్ర ఆందోళనకు గురవుతున్నారు. కహార్కా గ్రామానికి చెందిన కపిల్‌ త్యాగి ఇంట్లో గత ఎనిమిదేళ్లుగా పాములు తరచూ కనిపిస్తున్నాయి. అయితే గత వారం రోజులుగా వాటి సంఖ్య ఒక్కసారిగా పెరిగింది. దీంతో అటవీ శాఖ సిబ్బంది రంగంలోకి దిగి, ఏడు రోజుల్లో సుమారు 30 పాములను పట్టుకుని సమీపంలోని అడవిలో విడిచిపెట్టారు. పట్టుకున్న పాములన్నీ నాగుపాములేనని అధికారులు గుర్తించారు.

పాముల బెడదకు కారణం తెలుసుకునేందుకు కపిల్‌ త్యాగి తన ఇంటి ఆవరణను తవ్వించాలని నిర్ణయించుకున్నారు. ఈ క్రమంలో దాదాపు 100 పాము గుడ్లు బయటపడటంతో కుటుంబ సభ్యులు మరింత భయాందోళనకు గురయ్యారు. పాముల సంచారం కారణంగా కుటుంబ సభ్యులు రాత్రిపూట కూడా నిద్రపోకుండా అప్రమత్తంగా ఉంటున్నారు. విషయం తెలుసుకున్న జిల్లా అటవీ అధికారి వినోద్‌ కుమార్‌ ఆ ఇంటిని పరిశీలించి, కుటుంబ సభ్యులకు పలు జాగ్రత్తలు సూచించారు.