నేడు సిరిసిల్లకు ముఖ్యమంత్రి రేవంత్ రెడ్డి

తెలంగాణ ముఖ్యమంత్రి రేవంత్‌ రెడ్డి నేడు సిరిసిల్లలో పర్యటించనున్నారు. సిరిసిల్ల నియోజకవర్గంలో రూ.345.78 కోట్ల విలువైన వివిధ అభివృద్ధి పనులకు శంకుస్థాపనలు, ప్రారంభోత్సవాలు చేయనున్నారు. కరీంనగర్‌ నుంచి హెలికాప్టర్‌లో సిరిసిల్ల ప్రభుత్వ జూనియర్‌ కళాశాల హెలిప్యాడ్‌కు చేరుకుని, అంబేడ్కర్‌ చౌరస్తా నుంచి సభా వేదిక వరకు నిర్వహించే ర్యాలీలో పాల్గొంటారు. అనంతరం అభివృద్ధి కార్యక్రమాలను ప్రారంభించి, భారీ బహిరంగ సభలో ప్రసంగించనున్నారు.

సిరిసిల్లలో నేతన్న బజార్‌, సిరిసిల్ల, వేములవాడలో రూ.200 కోట్ల అంచనా వ్యయంతో యంగ్‌ ఇండియా ఇంటిగ్రేటెడ్‌ రెసిడెన్షియల్‌ స్కూళ్లు, సిరిసిల్ల, కోనరావుపేటలో తెలంగాణ పబ్లిక్‌ స్కూళ్లకు శంకుస్థాపనలు చేయనున్నారు. వేములవాడ శ్రీ రాజరాజేశ్వర స్వామి ఆలయ అభివృద్ధి పనులు, సిరిసిల్ల, వేములవాడలో ఆర్‌డీవో కార్యాలయాలు, నాలుగు తహసీల్దార్‌ కార్యాలయాలు, వేములవాడలో సబ్‌ రిజిస్ట్రార్‌ కార్యాలయం, రుద్రంగిలో 10 వేల మెట్రిక్‌ టన్నుల సామర్థ్యం గల గోదాం నిర్మాణానికి కూడా శంకుస్థాపన చేయనున్నారు. పెద్దూరులో నిర్మించిన ఇందిరా మహిళా శక్తి భవన్‌ను ప్రారంభించడంతో పాటు వేములవాడలో మహిళా పోలీస్‌ స్టేషన్‌, వేములవాడ, సిరిసిల్లలో ట్రాఫిక్‌ పోలీస్‌ స్టేషన్లకు శంకుస్థాపన చేయనున్నారు.