ట్రాఫిక్ ఇబ్బందులకు చెక్.. కూడళ్ల వద్ద భవనాలపై కొత్త రూల్స్

రహదారి భద్రత, ట్రాఫిక్ సౌలభ్యాన్ని మెరుగుపరిచే లక్ష్యంతో తెలంగాణ ప్రభుత్వం ‘క్యూర్ (CURE) బిల్లు-2026’ ముసాయిదాలో కొత్త నిబంధనలను ప్రతిపాదించింది. ముఖ్యంగా గ్రేటర్ హైదరాబాద్ పరిధిలో రోడ్డు కూడళ్ల వద్ద ఉన్న భవనాల మూలలను 90 డిగ్రీల కోణంలో కాకుండా గుండ్రంగా లేదా ఏటవాలుగా మార్చేలా చర్యలు తీసుకునే అధికారాన్ని సంబంధిత మున్సిపల్ కమిషనర్లకు ఇవ్వాలని ప్రభుత్వం ప్రతిపాదించింది.

ఈ నిబంధనలు ప్రస్తుతం ఉన్న భవనాలు, నిర్మాణంలో ఉన్నవి, భవిష్యత్తులో నిర్మించనున్న భవనాలు, మరమ్మతులు చేపట్టే భవనాలన్నింటికీ వర్తిస్తాయి. అవసరమైతే ప్రహరీలు, ఫెన్సింగ్, చెట్లపొదలు, చెట్లలో మార్పులు చేయాలని కూడా కమిషనర్లు ఆదేశించవచ్చు. అలాగే ప్రతి నివాస వీధిలో తప్పనిసరిగా వీధి దీపాలు ఏర్పాటు చేయాలని బిల్లు పేర్కొంది. ఈ మార్పుల వల్ల ఆస్తి యజమానులకు నష్టం జరిగితే చట్టం ప్రకారం పరిహారం అందజేస్తారు.