కుప్పం నుంచి పట్టణాభివృద్ధి పనులకు చంద్రబాబు శ్రీకారం

చిత్తూరు జిల్లా కుప్పం నుంచి రాష్ట్రవ్యాప్తంగా పట్టణ స్థానిక సంస్థల్లో చేపట్టనున్న భారీ అభివృద్ధి పనులకు ముఖ్యమంత్రి చంద్రబాబు నాయుడు వర్చువల్‌గా శ్రీకారం చుట్టారు. పట్టణాల రూపురేఖలను మార్చే లక్ష్యంతో మున్సిపాలిటీలు, మున్సిపల్ కార్పొరేషన్ల పరిధిలో మొత్తం రూ.11,359 కోట్ల విలువైన పనులను ప్రారంభించారు. ఇందులో 123 మున్సిపాలిటీల్లో రూ.7,469 కోట్ల పనులతో పాటు గ్రేటర్ విశాఖపట్నం మున్సిపల్ కార్పొరేషన్ పరిధిలో రూ.3,890 కోట్ల విలువైన పనులు ఉన్నాయి. కార్యక్రమంలో పురపాలక శాఖ మంత్రి పి. నారాయణ, ముఖ్య కార్యదర్శి సురేశ్ కుమార్, డైరెక్టర్ సంపత్ తదితరులు విశాఖ నుంచి పాల్గొన్నారు.

హైబ్రిడ్ యాన్యుటీ మోడల్‌లో తొలిసారిగా ఈ అభివృద్ధి పనులను చేపడుతున్నట్లు ప్రభుత్వం తెలిపింది. పట్టణ స్థానిక సంస్థలపై ఆర్థిక భారం పడకుండా ఈ విధానంలో పనులు చేపట్టనున్నారు. ప్రాజెక్టులో భాగంగా 2,165 కిలోమీటర్ల రోడ్లు, 502 పార్కులు, 210 కిలోమీటర్ల సెంట్రల్ మీడియన్లు, 391 కిలోమీటర్ల స్ట్రీట్ లైటింగ్, 300 కిలోమీటర్ల సీవరేజ్ పనులు చేపట్టనున్నారు. రోడ్లకు రూ.4,656 కోట్లు, పార్కులకు రూ.509 కోట్లు, స్ట్రీట్ లైటింగ్‌కు రూ.247 కోట్లు, సెంట్రల్ మీడియన్లకు రూ.88 కోట్లు కేటాయించారు. విశాఖలో కూడా నీటి సరఫరా, సీవరేజ్, రోడ్లు, పార్కులు, ఏఐ ట్రాఫిక్ మేనేజ్‌మెంట్ వంటి ప్రాజెక్టులు చేపడుతున్నారు.