తన జీవితంలో చీకటి రోజులను గుర్తుచేసుకున్న సోనియా గాంధీ

1991లో తన భర్త, మాజీ ప్రధాని రాజీవ్ గాంధీ హత్యకు గురైన తర్వాత తాను అనుభవించిన తీవ్ర మానసిక వేదనను కాంగ్రెస్ నేత సోనియా గాంధీ మరోసారి గుర్తుచేసుకున్నారు. తన జ్ఞాపకాలతో రాసిన బిలాంగింగ్: ఎ జర్నీ ఆఫ్ లవ్ పుస్తకం విడుదలకు ముందు ది గార్డియన్కు ఇచ్చిన ఇంటర్వ్యూలో ఆమె ఈ విషయాలను వెల్లడించారు. రాజీవ్ మరణంతో తీవ్ర విషాదంలో మునిగిపోయిన సమయంలో ఇటలీకి తిరిగి వెళ్లిపోవాలని తన సోదరి సూచించారని తెలిపారు. అయితే భారత్‌ను వదిలి వెళ్లడం తనవల్ల కాలేదని, భారత్ తన ఇల్లు మాత్రమే కాకుండా తన పిల్లల ఇల్లు కూడా అని భావించానని భావోద్వేగంగా చెప్పారు. ఈ సందర్భంగా కుమార్తె ప్రియాంక గాంధీ కూడా ఆ కష్టకాలాన్ని గుర్తుచేసుకున్నారు. తన తల్లి గంటల తరబడి చీకటి గదిలో ఒంటరిగా కూర్చుని మొజార్ట్ సంగీతంలోని రిక్వియమ్ వింటూ గడిపేవారని తెలిపారు. రాజీవ్ తనను ఒంటరిగా ఎలా వదిలి వెళ్లిపోయారని తల్లి బాధతో ప్రశ్నించేవారని ప్రియాంక గుర్తుచేసుకున్నారు. రాజీవ్ హత్యకు ముందు ఆయనకు ముప్పు పొంచి ఉందని నిఘా సంస్థలు హెచ్చరికలను గుర్తించినట్లు తర్వాత తెలుసుకున్నానని సోనియా వెల్లడించారు. ఆయన హత్య వెనుక ఉన్న పూర్తి నిజాలు ఇకపై కూడా వెలుగులోకి వస్తాయని తాను భావించడం లేదని పేర్కొన్నారు.

1991 మే 21న తమిళనాడులోని శ్రీపెరంబుదూరులో ఎన్నికల ప్రచార సభలో పాల్గొన్న రాజీవ్ గాంధీ, ఎల్‌టీటీఈతో సంబంధాలున్న మహిళా ఆత్మాహుతి దాడి చేసిన ఘటనలో హత్యకు గురయ్యారు. ఈ దాడిలో మరికొందరు కూడా ప్రాణాలు కోల్పోయారు. ఇటలీలో జన్మించిన సోనియా గాంధీ 1968లో రాజీవ్ గాంధీని వివాహం చేసుకుని భారత్‌కు వచ్చారు. తొలినాళ్లలో రాజకీయాలకు దూరంగా ఉన్నప్పటికీ, భర్త హత్య తర్వాత క్రమంగా ప్రజా జీవితంలోకి అడుగుపెట్టారు. 1998లో కాంగ్రెస్ అధ్యక్ష బాధ్యతలు స్వీకరించారు. ఆమె నాయకత్వంలో కాంగ్రెస్ నేతృత్వంలోని యునైటెడ్ ప్రోగ్రెసివ్ అలయన్స్ (యూపీఏ) 2004 లోక్‌సభ ఎన్నికల్లో విజయం సాధించింది. అయితే, ప్రధానమంత్రి పదవిని స్వీకరించేందుకు ఆమె నిరాకరించారు. తన తాజా జ్ఞాపకాల పుస్తకంలో ఇటలీ నుంచి భారత్‌కు తన ప్రయాణం, కుటుంబ జీవితంలోని అనుభవాలు, రాజీవ్ గాంధీ మరణం, ఆ తర్వాత రాజకీయాల్లోకి వచ్చిన పరిస్థితులను సోనియా వివరించారు.