ఏపీలో నేటి నుంచి స్పెషల్ ఓటర్ డ్రైవ్.. తొలగించిన పేర్లపై ఇంటింటి తనిఖీలు!

ఆంధ్రప్రదేశ్‌లో ఓటర్ల జాబితా ప్రత్యేక సవరణ ప్రక్రియలో భాగంగా నేటి నుంచి స్పెషల్ ఓటర్ డ్రైవ్ ప్రారంభమైంది. డ్రాఫ్ట్ ఓటర్ల జాబితాలో పేర్లు లేకపోయిన వారితో పాటు తొలగించిన ఓటర్ల వివరాలను BLOలు ఇంటింటికీ వెళ్లి మరోసారి పరిశీలించనున్నారు. అర్హులైన ఏ ఒక్క ఓటరు కూడా జాబితాలో నుంచి మిగిలిపోకుండా చూడటమే ఈ ప్రత్యేక డ్రైవ్ ప్రధాన ఉద్దేశంగా అధికారులు తెలిపారు.

ఇంతకుముందు నిర్వహించిన ఇంటింటి పరిశీలనలో 44.89 లక్షల మంది ఓటర్లు తమ చిరునామాల్లో కనిపించలేదని గుర్తించారు. మరణం, శాశ్వతంగా వేరే ప్రాంతానికి వెళ్లడం, ఒకటికి మించి చోట్ల నమోదు, ఆచూకీ లభించకపోవడం వంటి కారణాలతో ఈ పేర్లను గుర్తించారు. అయితే అర్హత ఉన్న ఓటరు పేరు పొరపాటున తొలగించినట్లు తేలితే, BLOలు ఫామ్-6 సమర్పించేందుకు సహకరించనున్నారు. ఆ తర్వాత అవసరమైన ధృవీకరణ పూర్తిచేసి ఓటర్ల జాబితాలో పేరు చేర్చే అవకాశం ఉంటుంది. ఏపీలో తుది ఓటర్ల జాబితాను అక్టోబర్ 16న విడుదల చేయనున్నారు.