హైదరాబాద్‌లో తెలంగాణ తొలి టాటా.ఈవీ మెగాచార్జర్ హబ్ ప్రారంభం

భారతదేశపు అగ్రగామి సమగ్ర విద్యుత్ సంస్థ టాటా పవర్, టాటా ప్యాసింజర్ ఎలక్ట్రిక్ మొబిలిటీ లిమిటెడ్ (TPEM)తో కలిసి తెలంగాణలో తొలి టాటా.ఈవీ మెగాచార్జర్ హబ్‌ను హైదరాబాద్‌లోని ఐలాబ్స్ సెంటర్‌లో ప్రారంభించింది. హైటెక్ సిటీ నడిబొడ్డున ఏర్పాటు చేసిన ఈ హై-స్పీడ్ ఛార్జింగ్ కేంద్రం నగరంలో వేగంగా పెరుగుతున్న ఎలక్ట్రిక్ వాహనాల వినియోగదారుల అవసరాలను తీర్చేందుకు ప్రత్యేకంగా రూపొందించారు. వ్యక్తిగత ఈవీ యజమానులు, కమర్షియల్ ఫ్లీట్ నిర్వాహకులు, క్యాబ్ సేవలు, నగరాల మధ్య ప్రయాణించే వారు, కార్పొరేట్ ఉద్యోగులు ఈ సదుపాయాన్ని వినియోగించుకోగలరు.

మొత్తం 360 కిలోవాట్ల ఛార్జింగ్ సామర్థ్యంతో ఏర్పాటు చేసిన ఈ కేంద్రంలో మూడు 120 కిలోవాట్ల ఫాస్ట్ ఛార్జర్లు ఉన్నాయి. వీటి ద్వారా ఒకేసారి ఆరు ఎలక్ట్రిక్ వాహనాలకు ఛార్జింగ్ అందించవచ్చు. 24 గంటల పాటు అందుబాటులో ఉండే ఈ సదుపాయం వల్ల ఛార్జింగ్ సమయం తగ్గడమే కాకుండా, వినియోగదారులకు వేగవంతమైన, విశ్వసనీయమైన సేవలు లభిస్తాయి. తెలంగాణలో ఎలక్ట్రిక్ వాహనాల మౌలిక సదుపాయాల అభివృద్ధికి ఇది మరో కీలక ముందడుగుగా భావిస్తున్నారు.