భారత ఆర్థిక భద్రతకు కొత్త అడుగు: ఎస్‌బీఐ చైర్మన్ సూచించిన నేషనల్ ఫైనాన్షియల్ గ్రిడ్

ఎస్‌బీఐ చైర్మన్ చల్లా శ్రీనివాసులు శెట్టి దేశంలో ఆర్థిక మోసాలను అరికట్టడంతో పాటు రిస్క్ నిర్వహణను మెరుగుపరచేందుకు నేషనల్ ఫైనాన్షియల్ గ్రిడ్ (NFG) ఏర్పాటు చేయాల్సిన అవసరం ఉందని సూచించారు. ముంబైలో జరిగిన సీఐఐ ఫైనాన్షియల్ సమ్మిట్‌లో మాట్లాడిన ఆయన, ఆర్థిక సేవల రంగంలోని కీలక వ్యవస్థలను ఒకే గ్రిడ్‌తో అనుసంధానించాలన్నారు.

ఈ గ్రిడ్‌కు క్రెడిట్ రేటింగ్ బ్యూరోలు, ఫ్రాడ్ రిజిస్ట్రీలు, ఈ-కేవైసీ, యూపీఐ, అకౌంట్ అగ్రిగేటర్లు, తాజాగా ప్రవేశపెట్టిన యూనిఫైడ్ లెండింగ్ ఇంటర్‌ఫేస్ (ULI) అన్నీ అనుసంధానం కావాలని శెట్టి అభిప్రాయపడ్డారు. వినియోగదారుల రక్షణ కోసం రియల్‌టైమ్ డేటా పంచుకునే విధానంతో లాభాపేక్ష లేని సంస్థ ఇండియన్ డిజిటల్ పేమెంట్ ఇన్‌టెలిజెన్స్ కార్పొరేషన్ ఏర్పాటైందని తెలిపారు.

చిన్న వ్యాపారుల కోసం డిజిటల్ ట్విన్ సూచన

చిన్న వ్యాపారులకు సులభంగా రుణాలు అందించేందుకు "డిజిటల్ ట్విన్" వ్యవస్థను రూపొందించాలని కూడా ఎస్‌బీఐ చైర్మన్ సూచించారు. ఈ డిజిటల్ ట్విన్ వ్యాపార సంస్థకు సంబంధించిన పూర్తిస్థాయి సమాచారాన్ని సేకరించి భద్రపరుస్తుంది. దీని ద్వారా:

వ్యాపార సంస్థ ఆర్థిక పరిస్థితి స్పష్టంగా తెలుస్తుంది

రుణ ప్రక్రియ వేగవంతం అవుతుంది

డేటా ఆధారిత రుణ విధానాన్ని అమలు చేయడం సులభమవుతుంది

ఇప్పటికీ ఆర్థిక సేవలు అందరికీ అందుబాటులోకి రాలేకపోవడంతో, చిన్న వ్యాపారాలు అసంఘటిత రంగం నుంచి అధిక వడ్డీకి రుణాలు తీసుకునే పరిస్థితి ఉందని శెట్టి పేర్కొన్నారు. ఎంఎస్‌ఎంఈలకు సత్సంబంధాల ఆధారిత విధానానికి బదులు డేటా ఆధారిత వ్యవస్థను తీసుకురావడంలో డిజిటల్ ట్విన్ కీలక పాత్ర పోషిస్తుందని అన్నారు.