నగరాల్లో రూఫ్‌టాప్ లో ఫ్లైట్స్ టేకాఫ్‌, ల్యాండింగ్

భారత పరిశ్రమల సమాఖ్య (సీఐఐ) ప్రకారం, ఎయిర్‌ ట్యాక్సీల టేకాఫ్‌-ల్యాండింగ్ కోసం భవనాల పైకప్పులను (రూఫ్‌టాప్స్‌) ఉపయోగించడం ద్వారా, పెద్ద నగరాల్లో రద్దీని తగ్గించి, రవాణా సమయాన్ని తగ్గించవచ్చని సూచించారు. సీఐఐ రూపొందించిన ‘నావిగేటింగ్ ది ఫ్యూచర్ ఆఫ్ అడ్వాన్స్‌డ్ ఎయిర్ మొబిలిటీ ఇన్ ఇండియా’ నివేదికలో, అడ్వాన్స్‌డ్ ఎయిర్‌ మొబిలిటీ (ఏఏఎం) వ్యవస్థలో ఎలక్ట్రిక్ వర్టికల్ టేక్ ఆఫ్ అండ్ ల్యాండింగ్ (eVTOL) ఎయిర్‌క్రాఫ్ట్‌లు/ఎయిర్‌ ట్యాక్సీలు వేగంగా అభివృద్ధి చెందుతున్నాయని పేర్కొంది. వీటికి భవనాల పైకప్పులను వాడటం, మౌలిక సదుపాయాల కొరతను ఎదుర్కోకుండా వ్యవస్థను సమర్థంగా ఆపరేట్ చేయడానికి సహాయపడుతుంది.

ఏఏఎం రంగంలో వెంచర్ లీజింగ్, రంగానుసారంగా మౌలిక సదుపాయాల ఫండింగ్ వంటి ప్రత్యేక ఆర్థిక సదుపాయాలను బ్యాంకులు, ఫైనాన్షియల్ సంస్థలు పరిశీలించవచ్చని నివేదిక సూచించింది. దిల్లీ, ముంబై, బెంగళూరు వంటి పెద్ద నగరాల్లో ఎయిర్‌ ట్యాక్సీల రాకపోకలకు భవనాల పైకప్పులను వినియోగించడం సమర్థవంతమైన పరిష్కారం అని పేర్కొంది. దీని కోసం వాణిజ్య సముదాయాలు, ఆసుపత్రులు, టెక్ పార్కులు, నివాస టవర్లు ప్రధానంగా ఉపయోగపడతాయని సూచించారు.

ప్రస్తుత నిబంధనలు భవనాల పైకప్పుల నుంచి సాధారణ వాణిజ్య వర్టికల్ టేక్ ఆఫ్‌-ల్యాండింగ్‌లను అనుమతించవు. ఏఏఎం కోసం ఈ నియమాలను సవరించాల్సి ఉంది. వీటిని డ్రోన్ల, అత్యవసర వైద్య సరఫరా, అవయవాల రవాణా, ఎయిర్ అంబులెన్స్ వంటి సేవల కోసం కూడా ఉపయోగించవచ్చని నివేదిక వివరించింది. అదేవిధంగా, దిల్లీ సమీపంలోని గురుగ్రామ్ నుండి కొత్తగా ప్రారంభం కానున్న జెవార్ గేట్‌వే వరకు 65–75 కిలోమీటర్ల కారిడార్‌ను నమూనాగా తీసుకుని, దేశంలో ఏఏఎం అమలు సాధ్యాసాధ్యాలను అంచనా వేసింది. ఈ ప్రాంతాలు అన్ని జాతీయ రాజధాని ప్రాంతం (NCR)లో ఉన్నాయి మరియు ఉత్తర్‌ప్రదేశ్‌లోని నోయిడా అంతర్జాతీయ విమానాశ్రయం త్వరలో ప్రారంభం కానుంది.