పోటీకి సిద్ధం..చట్టాల విషయంలో రాజీ లేదన్న రిలయన్స్‌

భారత శాటిలైట్‌ కమ్యూనికేషన్స్‌ రంగంలో ఎలన్‌ మస్క్‌కు చెందిన స్టార్‌లింక్‌తో సహా ఏ కంపెనీ నుంచి ఎదురయ్యే పోటీనైనా స్వాగతిస్తున్నామని రిలయన్స్‌ ఇండస్ట్రీస్‌ లిమిటెడ్‌ శుక్రవారం స్పష్టం చేసింది. అయితే, భారతీయ సంస్థలైనా, విదేశీ కంపెనీలైనా దేశ చట్టాలు, నిబంధనలను తప్పనిసరిగా పాటించాల్సిందేనని పేర్కొంది. రిలయన్స్‌ అధినేత ముఖేష్‌ అంబానీపై మస్క్‌ ఇటీవల చేసిన విమర్శలపై తొలిసారిగా స్పందించిన సంస్థ పోటీ అంటే తమకు ఎప్పుడూ భయం లేదని, వినియోగదారులకు మెరుగైన సేవలు అందించేది ఎవరో నిరూపించడానికి పోటీనే సరైన పరీక్ష అని తెలిపింది.

2016లో ఒక్క కస్టమర్‌ కూడా లేకుండా టెలికాం రంగంలోకి ప్రవేశించిన జియో, ప్రస్తుతం 53 కోట్లకు పైగా వినియోగదారుల నమ్మకాన్ని గెలుచుకుందని రిలయన్స్‌ పేర్కొంది. స్టార్‌లింక్‌కు లైసెన్సు రాకుండా కొందరు వ్యాపార దిగ్గజాలు అడ్డుకుంటున్నారన్న ఆరోపణలను తోసిపుచ్చింది. జియో సొంత శాటిలైట్‌ సేవలకు కూడా ఇంకా అనుమతులు రావాల్సి ఉందని గుర్తు చేసింది. స్వదేశీ, విదేశీ సంస్థలన్నింటికీ ప్రభుత్వం ఒకే విధమైన అనుమతుల ప్రక్రియను అనుసరిస్తుందని స్పష్టం చేసింది.

మరోవైపు, భారతీ ఎయిర్‌టెల్‌ చైర్మన్‌ సునీల్‌ మిట్టల్‌ స్పందిస్తూ, అనుమతుల విషయంలో తాము మస్క్‌ కంటే ఐదేళ్లు ముందున్నామని అన్నారు. భారత్‌లో శాటిలైట్‌ ఇంటర్నెట్‌ సేవలను ప్రారంభించేందుకు స్టార్‌లింక్‌ ప్రయత్నాలను కొన్ని శక్తిమంతమైన వ్యాపార వర్గాలు అడ్డుకుంటున్నాయని మస్క్‌ ఆరోపించడంతో వివాదం మొదలైంది. ఈ ఆరోపణలను కేంద్ర ప్రభుత్వం తోసిపుచ్చింది. స్టార్‌లింక్‌, జియో శాటిలైట్‌, ఎయిర్‌టెల్‌కు చెందిన వన్‌వెబ్‌ ప్రస్తుతం ఒకే విధమైన నియంత్రణ ప్రక్రియ దశలో ఉన్నాయని, కేంద్ర హోం శాఖ నుంచి తుది అనుమతులు వచ్చిన తర్వాత కేటాయింపులు జరుగుతాయని స్పష్టం చేసింది.