వడ్డీ రేట్లపై ఆర్‌బీఐ కీలక నిర్ణయం..సామాన్యులకు షాక్ తప్పదా?

దేశంలో వడ్డీ రేట్లు తగ్గే అవకాశాల కంటే మరింత పెరిగే అవకాశాలే ఎక్కువగా ఉన్నాయని ఐడీఎఫ్‌సీ ఫస్ట్ బ్యాంక్ ఎకనామిక్ రీసెర్చ్ నివేదిక అంచనా వేసింది. డిసెంబరు 2 నుంచి 4 వరకు జరిగే సమావేశంలో భారతీయ రిజర్వ్ బ్యాంక్ (ఆర్‌బీఐ) ద్రవ్య విధాన కమిటీ (ఎంపీసీ) కీలక రెపో రేటును 0.25 శాతం పెంచవచ్చని పేర్కొంది. వచ్చే ఏడాది ఫిబ్రవరిలో జరిగే సమావేశంలో మరో 0.25 శాతం పెంపు ఉండొచ్చని అంచనా వేసింది. ఈ రెండు పెంపులు అమలైతే ప్రస్తుతం 5.5 శాతంగా ఉన్న రెపో రేటు 6 శాతానికి చేరుతుంది. ఆర్థిక పరిస్థితులను బట్టి 2027 ఏప్రిల్‌లో జరిగే సమావేశంలోనూ మరో 0.25 శాతం పెంపు ఉండే అవకాశాన్ని నివేదిక తోసిపుచ్చలేదు. బ్యాంకులు, ఎన్‌బీఎఫ్‌సీలు తమ రుణాలు, ఇతర వడ్డీ రేట్లను నిర్ణయించడంలో ఆర్‌బీఐ రెపో రేటు కీలక ప్రమాణంగా ఉంటుంది.

విదేశీ పోర్టుఫోలియో పెట్టుబడులు పెరిగినా డాలర్‌తో పోలిస్తే రూపాయి విలువలో పెద్దగా కోలుకోవడం కనిపించకపోవచ్చని నివేదిక పేర్కొంది. ఫార్వర్డ్ ఫారెక్స్ మార్కెట్లో ఆర్‌బీఐ నెట్ డాలర్ షార్ట్ పొజిషన్ సుమారు 23,900 కోట్ల డాలర్లకు చేరడం రూపాయి బలపడేందుకు అడ్డంకిగా మారవచ్చని తెలిపింది. గత ఏడాది అక్టోబరులో దేశ విదేశీ మారక నిల్వలు సుమారు పది నెలల దిగుమతులకు సరిపడా ఉండగా, ఈ ఏడాది గత నెలాఖరు నాటికి అవి ఏడు నెలల దిగుమతులకు సరిపడే స్థాయికి తగ్గినట్లు నివేదిక వివరించింది. రానున్న సంవత్సరాల్లో దేశంలోకి వచ్చే డాలర్లను ఆర్‌బీఐ తన నిల్వల్లోకి తీసుకునే అవకాశం ఉందని అంచనా వేసింది. అయితే రూపాయి విలువ భారీగా పడిపోయే ప్రమాదం లేదని, 2026 డిసెంబరు నుంచి 2027 జూన్ మధ్య డాలర్‌తో రూపాయి మారకం విలువ రూ.92–96 మధ్య ఉండవచ్చని పేర్కొంది.

మరోవైపు భారత్‌కు కొంత ఊరట కలిగించేలా ముడి చమురు ధరలు తగ్గే అవకాశం ఉందని ఐడీఎఫ్‌సీ ఫస్ట్ బ్యాంక్ నివేదిక అంచనా వేసింది. ప్రస్తుత ఆర్థిక సంవత్సరం తొలి ఏడు నెలల్లో భారత్ దిగుమతి చేసుకున్న ముడి చమురు సగటు ధర బ్యారెల్‌కు సుమారు 102 డాలర్లుగా ఉండగా, వచ్చే ఐదు నెలల్లో అది 85 డాలర్లకు తగ్గవచ్చని తెలిపింది. అమెరికా, ఇరాన్ మధ్య కాల్పుల విరమణ ఒప్పందం కుదిరితే చమురు ధరలు మరింత భారీగా తగ్గే అవకాశం ఉందని పేర్కొంది. చమురు ధరలు తగ్గితే భారత్ దిగుమతి బిల్లు, ఆర్థిక వ్యవస్థపై ఒత్తిడి కొంత మేర తగ్గే అవకాశముంది. అయితే ఈ అంచనాలు అంతర్జాతీయ మార్కెట్ పరిస్థితులు, భౌగోళిక రాజకీయ పరిణామాలపై ఆధారపడి ఉంటాయి.