పండుగ వేళ వినియోగదారుల జేబుకు చిల్లు

హిందుస్థాన్ యూనిలీవర్ లిమిటెడ్ (హెచ్‌యూఎల్) తన హోం కేర్ విభాగంలోని పలు ఉత్పత్తుల గరిష్ఠ చిల్లర ధరలను (ఎంఆర్‌పీ) 11 శాతం వరకు పెంచింది. ప్రముఖ డిటర్జెంట్ బ్రాండ్లైన సర్ఫ్ ఎక్సెల్, రిన్, వీల్ ఉత్పత్తులు కూడా ఈ ధరల పెంపు పరిధిలోకి వచ్చాయి. ప్యాక్ పరిమాణాన్ని బట్టి ధరలు రూ.1 నుంచి రూ.10 వరకు పెరిగాయి. దీంతో నిత్యావసర గృహోపయోగ వస్తువులైన ఈ డిటర్జెంట్లను కొనుగోలు చేసే వినియోగదారులపై అదనపు భారం పడనుంది. అయితే ప్యాక్ సైజును బట్టి ధరల పెంపులో వ్యత్యాసం ఉండనుంది.

ముడి సరుకుల ధరలు పెరగడంతో హోం కేర్ వ్యాపారంపై ఏర్పడిన వ్యయ భారాన్ని తగ్గించుకోవడంతో పాటు లాభాల మార్జిన్లను కాపాడుకునేందుకు కంపెనీ ఈ నిర్ణయం తీసుకుంది. ముడి పదార్థాల ధరల్లో మార్పులు ఎఫ్‌ఎంసీజీ సంస్థల నిర్వహణ వ్యయాలపై ప్రభావం చూపుతున్నాయి. ఈ నేపథ్యంలో అన్ని ఉత్పత్తులపై ఒకే విధంగా ధరలు పెంచకుండా, ప్యాక్ పరిమాణాలను బట్టి హెచ్‌యూఎల్ ధరలను సవరించింది. పెరుగుతున్న ఉత్పత్తి వ్యయాలు, లాభదాయకత మధ్య సమతుల్యత సాధించేందుకు కంపెనీలు తీసుకుంటున్న చర్యల్లో ఈ ధరల పెంపు కూడా ఒకటిగా నిలుస్తోంది.