తెలంగాణలో హైనెకెన్ భారీ పెట్టుబడి.. కొత్త కేంద్రం ప్రారంభం

ప్రపంచంలోనే రెండో అతిపెద్ద బ్రూయింగ్ కంపెనీ హైనెకెన్ (HEINEKEN) హైదరాబాద్ ఫైనాన్షియల్ డిస్ట్రిక్ట్‌లో తన గ్లోబల్ కేపబిలిటీ సెంటర్‌ను ప్రారంభించింది. “హైనెకెన్ బిజినెస్ సర్వీసెస్ ఇండియా” పేరుతో 76 వేల చదరపు అడుగుల విస్తీర్ణంలో ఏర్పాటు చేసిన ఈ కేంద్రాన్ని రాష్ట్ర ఐటీ, పరిశ్రమల శాఖ మంత్రి దుద్దిళ్ల శ్రీధర్ బాబు ఈ రోజు లాంఛనంగా ప్రారంభించారు. ఈ కేంద్రం తెలంగాణకు అంతర్జాతీయ స్థాయి పెట్టుబడులు, ఉపాధి అవకాశాలను తీసుకురానుందని ప్రభుత్వం పేర్కొంది.

ఈ గ్లోబల్ కేపబిలిటీ సెంటర్ ఫైనాన్స్, డిజిటల్, టెక్నాలజీ, అనలిటిక్స్ రంగాల్లో ప్రపంచ స్థాయి సేవలను అందించే వ్యూహాత్మక కేంద్రంగా పనిచేయనుంది. ప్రస్తుతం 300 మందికి పైగా నిపుణులకు ఉపాధి అవకాశాలు లభించనున్నాయి. రాబోయే రోజుల్లో ఈ సంఖ్య 1,600కు పెరగనున్నట్లు సంస్థ వెల్లడించింది.

150 ఏళ్లకు పైగా చరిత్ర కలిగిన హైనెకెన్ ప్రపంచ బ్రూయింగ్ రంగంలో ప్రముఖ సంస్థగా గుర్తింపు పొందింది. ప్రపంచవ్యాప్తంగా 190కి పైగా దేశాల్లో హైనెకెన్ ఉత్పత్తులు విక్రయించబడుతున్నాయి. అలాగే 70కి పైగా దేశాల్లో 165కు పైగా బ్రూవరీలను సంస్థ నిర్వహిస్తోంది. హైదరాబాద్‌లో ఈ కేంద్రం ప్రారంభం నగరాన్ని గ్లోబల్ బిజినెస్ హబ్‌గా మరింత బలోపేతం చేస్తుందని విశ్లేషకులు భావిస్తున్నారు.