రిలయన్స్ ఇండస్ట్రీస్‌కు రికార్డు స్థాయి లాభాలు..

ముకేశ్ అంబానీ నేతృత్వంలోని రిలయన్స్ ఇండస్ట్రీస్ లిమిటెడ్ (ఆర్‌ఐఎల్‌) 2026-27 ఆర్థిక సంవత్సరం సెప్టెంబరుతో ముగిసిన రెండో త్రైమాసికంలో రికార్డు స్థాయి ఆర్థిక ఫలితాలను ప్రకటించింది. కంపెనీ ఏకీకృత నికర లాభం గత ఏడాది ఇదే త్రైమాసికంలోని రూ.22,092 కోట్లతో పోలిస్తే 33.8 శాతం పెరిగి రూ.29,550 కోట్లకు చేరింది. ఏకీకృత ఆదాయం 28 శాతం వృద్ధితో రూ.3,62,268 కోట్లుగా నమోదైంది. ఎబిటా 23.9 శాతం పెరిగి రూ.62,409 కోట్లకు చేరగా, ఒక్కో షేరుపై ఆదాయం రూ.13.42 నుంచి రూ.18.88కు పెరిగింది. ఆర్థిక సంవత్సరం తొలి ఆరు నెలల్లో కంపెనీ నికర లాభం రూ.52,746 కోట్లుగా నమోదైంది. జూన్ చివరి నాటికి రూ.1,22,914 కోట్లుగా ఉన్న నికర రుణ భారం సెప్టెంబర్ 30 నాటికి రూ.1,17,140 కోట్లకు తగ్గింది. చమురు శుద్ధి మార్జిన్లు మెరుగుపడటం, జియో వ్యాపారం వృద్ధి చెందడం కంపెనీ లాభాల పెరుగుదలకు ప్రధాన కారణాలుగా నిలిచాయి.

కంపెనీ ఆయిల్ టు కెమికల్స్ (ఓ2సీ) విభాగం ఎబిటా 67.9 శాతం పెరిగి రూ.25,203 కోట్లకు, ఆదాయం 44.2 శాతం వృద్ధితో రూ.2,31,601 కోట్లకు చేరింది. మరోవైపు రిలయన్స్ రిటైల్ ఆదాయం 6.4 శాతం పెరిగి రూ.91,716 కోట్లకు చేరినా, నికర లాభం 24.5 శాతం తగ్గి రూ.2,619 కోట్లుగా నమోదైంది. సెప్టెంబర్ చివరి నాటికి ఈ విభాగానికి 19,947 స్టోర్లు ఉన్నాయి. ఆయిల్ అండ్ గ్యాస్ విభాగం ఆదాయం 0.6 శాతం తగ్గి రూ.6,020 కోట్లకు, ఎబిటా 2 శాతం తగ్గి రూ.4,901 కోట్లకు పరిమితమయ్యాయి. జియోస్టార్ ఆదాయం 9.8 శాతం పెరిగి రూ.7,944 కోట్లకు చేరగా, ఎబిటా 13.6 శాతం తగ్గి రూ.1,502 కోట్లుగా నమోదైంది. మరోవైపు నాన్ కన్వర్టబుల్ డిబెంచర్ల జారీ ద్వారా రూ.15,000 కోట్ల వరకు సమీకరించేందుకు రిలయన్స్ బోర్డు ఆమోదం తెలిపింది. జియో ప్లాట్‌ఫామ్స్ రెండో త్రైమాసికంలో రూ.8,389 కోట్ల నికర లాభాన్ని ప్రకటించింది. ఇది గత ఏడాదితో పోలిస్తే 13.7 శాతం అధికం. ఆదాయం 11.4 శాతం పెరిగి రూ.40,475 కోట్లకు చేరింది. ఈ మూడు నెలల్లో జియో వినియోగదారుల సంఖ్య 91 లక్షలు పెరిగి 54.24 కోట్లకు చేరగా, 5జీ వినియోగదారుల సంఖ్య 30 కోట్లుగా నమోదైంది. ఒక్కో వినియోగదారు నుంచి నెలవారీ సగటు ఆదాయం రూ.218.8కు, నెలవారీ డేటా వినియోగం 44.2 జీబీకి పెరిగింది.