భారత స్టాక్ మార్కెట్లలోకి మళ్లీ విదేశీ పెట్టుబడులు

వరుసగా రెండు నెలల పాటు దేశీయ స్టాక్‌ మార్కెట్లలో భారీగా అమ్మకాలు జరిపిన విదేశీ పోర్ట్‌ఫోలియో మదుపర్లు (ఎఫ్‌పీఐలు) మళ్లీ కొనుగోళ్ల బాట పట్టారు. ఈ నెల 2 నుంచి 9వ తేదీ మధ్య జరిగిన ఆరు ట్రేడింగ్‌ రోజుల్లోనే భారత ఈక్విటీ మార్కెట్లలో నికరంగా రూ.53,739 కోట్ల పెట్టుబడులు పెట్టారు. దీంతో దేశీయ మార్కెట్లలో సానుకూల వాతావరణం నెలకొంది. అంతకుముందు అక్టోబరులో రూ.34,843 కోట్లు, సెప్టెంబరులో రూ.35,861 కోట్ల పెట్టుబడులను ఎఫ్‌పీఐలు వెనక్కి తీసుకున్నారు. అమెరికాతో పాటు దక్షిణ కొరియా, తైవాన్‌, జపాన్‌ వంటి ఏఐ ఆధారిత మార్కెట్లలో షేర్లు పడిపోవడం, డేటా సెంటర్లపై భారీ పెట్టుబడుల నుంచి ఆశించిన ప్రతిఫలాలు వస్తాయా అనే సందేహాలు, ఏఐ రంగంపై నియంత్రణలు పెరగవచ్చనే ఆందోళనలు విదేశీ మదుపర్ల పెట్టుబడి వ్యూహాన్ని ప్రభావితం చేశాయి.

ఏఐ హార్డ్‌వేర్‌ రంగంపై భారత్‌ మార్కెట్లు తక్కువగా ఆధారపడటం, ఇటీవల మార్కెట్‌ దిద్దుబాటు తర్వాత లార్జ్‌ క్యాప్‌ షేర్ల ధరలు ఆకర్షణీయంగా మారడం విదేశీ పెట్టుబడులను ఆకర్షిస్తున్నాయి. దేశీయ కంపెనీల బలమైన త్రైమాసిక ఫలితాలు కూడా కొనుగోళ్లకు ప్రోత్సాహాన్నిస్తున్నాయి. ముఖ్యంగా ఆర్థిక సేవలు, బ్యాంకింగ్‌, ఐటీ, వాహన, టెలికాం రంగాలకు చెందిన భారీ కంపెనీల షేర్లలో ఎఫ్‌పీఐలు పెట్టుబడులు పెంచారు. ఫుల్లీ యాక్సెసబుల్‌ రూట్‌ (ఎఫ్‌ఏఆర్‌) ద్వారా భారత ప్రభుత్వ బాండ్లలోనూ రూ.7,558 కోట్ల పెట్టుబడులు పెట్టారు. అయితే, ఈ ఏడాది జనవరి నుంచి ఇప్పటివరకు ఎఫ్‌పీఐలు నికరంగా రూ.2.41 లక్షల కోట్ల విలువైన షేర్లను విక్రయించిన నేపథ్యంలో, ప్రస్తుత కొనుగోళ్లు కొనసాగుతాయా అనేది కీలకం. పెట్టుబడుల ప్రవాహం కొనసాగితే మిడ్‌క్యాప్‌, స్మాల్‌క్యాప్‌ షేర్లతో పోలిస్తే నిఫ్టీ, సెన్సెక్స్‌ వంటి ప్రధాన సూచీలు మెరుగైన పనితీరు కనబరిచే అవకాశం ఉంది.