ఈఎంఐల ఆఫర్స్ తో జాగ్రత్త అంటున్న నిపుణులు

‘ఇప్పుడే కొనండి.. తర్వాత చెల్లించండి’, ‘నో కాస్ట్ ఈఎంఐ’, ‘క్షణాల్లో ప్రీ అప్రూవ్డ్ లోన్’, ‘లైఫ్‌టైమ్ ఫ్రీ క్రెడిట్ కార్డు’ వంటి ప్రకటనలు వినియోగదారులను ఆకర్షిస్తున్నాయి. చేతిలో పూర్తి డబ్బు లేకపోయినా ఖరీదైన వస్తువులను సొంతం చేసుకోవచ్చనే భావనతో చాలామంది తమ ఆర్థిక సామర్థ్యానికి మించి ఖర్చు చేస్తున్నారు. కొత్త ఫోన్, కారు వంటి వస్తువులు మార్కెట్‌లోకి వచ్చినప్పుడల్లా పాతవి పనికిరావనే భావనతో వాటిని మార్చుకోవాలనే ధోరణి పెరుగుతోంది. ఇతరులతో పోల్చుకుంటూ ఆకర్షణీయమైన జీవనశైలిని కొనసాగించాలనే కోరికకు సులభంగా లభించే రుణాలు తోడవుతున్నాయి. అయితే ప్రతి ఈఎంఐ భవిష్యత్తులో చెల్లించాల్సిన ఆర్థిక బాధ్యతే. అనేక అప్పులు తీసుకుని వాయిదాలు కట్టే పరిస్థితిలో అనుకోకుండా వైద్య ఖర్చులు ఎదురైనా, ఉద్యోగంలో అనిశ్చితి ఏర్పడినా ఆర్థిక ఇబ్బందులు తలెత్తవచ్చు. చివరకు ఒక అప్పు తీర్చడానికి మరో అప్పు చేయాల్సిన పరిస్థితి కూడా రావచ్చు.

‘నో కాస్ట్ ఈఎంఐ’ వంటి ఆఫర్లలోనూ ప్రాసెసింగ్ ఫీజులు, ముందస్తు చెల్లింపులు, ఇతర ఛార్జీల రూపంలో ఖర్చులు ఉండే అవకాశం ఉంది. కాబట్టి నెలవారీ వాయిదా తక్కువగా ఉందని కొనుగోలు చవకైనదని భావించకూడదు. క్రెడిట్ కార్డు బిల్లులో కనీస మొత్తాన్ని మాత్రమే చెల్లిస్తే మిగిలిన బకాయిపై అధిక వడ్డీ పడుతుందనే విషయాన్ని గుర్తుంచుకోవాలి. ఇల్లు, పిల్లల చదువు, వ్యాపారం వంటి దీర్ఘకాలిక అవసరాల కోసం తీసుకునే రుణాలు అభివృద్ధికి తోడ్పడవచ్చు. కానీ ఇతరులను చూసి చేసే అనవసరపు అప్పులు ఆర్థిక భారంగా మారతాయి. నిజమైన ఆర్థిక స్వేచ్ఛ అంటే నచ్చిన ప్రతిదాన్నీ కొనగలగడం కాదు.. అవసరమైనప్పుడు ఉపయోగించుకునేందుకు పొదుపు ఉండటం, అనుకోని సమస్యలను ధైర్యంగా ఎదుర్కోగలగడం. కొనుగోలు కోరికలను కొంతకాలం వాయిదా వేయడం, రుణంపై పడే మొత్తం ఖర్చును ముందుగానే తెలుసుకోవడం, అవసరమైనప్పుడే అప్పు తీసుకోవడం వంటి అలవాట్లు ఆర్థిక స్థిరత్వాన్ని కాపాడతాయి. అప్పులపై ఆధారపడిన ఆడంబరమైన జీవితం కంటే పొదుపుతో కూడిన ప్రశాంతమైన జీవితమే విలువైనదని నిపుణులు సూచిస్తున్నారు.