కొనుగోళ్లను శాసిస్తున్న క్రెడిట్ కార్డులు

క్రెడిట్ కార్డులు ఇప్పుడు కేవలం బిల్లులు చెల్లించే సాధనాలు మాత్రమే కావు. స్మార్ట్‌ఫోన్ కొనుగోలు నుంచి విమాన టికెట్, సినిమా లేదా సంగీత కచేరీ టికెట్ వరకు ఏదైనా కొనుగోలు చేసే ముందు వినియోగదారులు ధర కంటే క్యాష్‌బ్యాక్, రివార్డులు, డిస్కౌంట్లు, ముందస్తు టికెట్ యాక్సెస్ వంటి ప్రయోజనాలను పరిశీలిస్తున్నారు. దీంతో కొనుగోలు నిర్ణయాలను ప్రభావితం చేసే కీలక సాధనంగా క్రెడిట్ కార్డులు మారాయి.

డిజిటల్ చెల్లింపుల విస్తరణతో పాటు యూపీఐకి అనుసంధానమైన రూపే క్రెడిట్ కార్డుల వినియోగం రోజువారీ ఖర్చుల వరకు విస్తరించింది. కిరాణా కొనుగోళ్లు, ఫుడ్ డెలివరీ, క్విక్ కామర్స్ సేవల్లో కూడా క్రెడిట్ కార్డుల వినియోగం పెరుగుతోంది. ఉద్యోగంలో చేరిన వెంటనే తొలి క్రెడిట్ కార్డు తీసుకునే యువత సంఖ్య పెరుగుతుండగా, ప్రయాణాలు, షాపింగ్, రివార్డుల కోసం వేర్వేరు కార్డులను వినియోగించే ధోరణి కూడా వేగంగా పెరుగుతోంది. దీంతో బ్యాంకులు కో బ్రాండెడ్ కార్డులు, ప్రత్యేక ఆఫర్లతో పోటీపడుతున్నాయి.

మార్కెట్ అంచనాల ప్రకారం భారత క్రెడిట్ కార్డు మార్కెట్ విలువ 2025లో 20.1 బిలియన్ డాలర్ల నుంచి 2034 నాటికి 38.3 బిలియన్ డాలర్లకు చేరనుంది. అయితే అధిక క్యాష్‌బ్యాక్‌లు, సులభమైన క్రెడిట్ కారణంగా అవసరం లేని ఖర్చులు పెరిగే ప్రమాదం ఉందని ఆర్థిక నిపుణులు హెచ్చరిస్తున్నారు. ఒకటి కంటే ఎక్కువ కార్డులు ఉపయోగించడం వల్ల బిల్లుల భారం, అధిక వడ్డీ కారణంగా ఆర్థిక ఒత్తిడి పెరిగే అవకాశం ఉందని సూచిస్తున్నారు.