92 పట్టణ స్థానిక సంస్థల్లో ప్రశాంతంగా ముగిసిన పోలింగ్- డీజీపీ హరీశ్ కుమార్ గుప్తా

రాష్ట్రవ్యాప్తంగా 92 పట్టణ స్థానిక సంస్థలకు నిర్వహించిన పోలింగ్‌ చెదురుమదురు ఘటనలు మినహా ప్రశాంతంగా ముగిసిందని డీజీపీ హరీశ్ కుమార్ గుప్తా తెలిపారు. ఓటర్లు భారీ సంఖ్యలో పోలింగ్‌ కేంద్రాలకు తరలివచ్చి తమ ప్రజాస్వామ్య హక్కును స్వేచ్ఛగా వినియోగించుకున్నారని పేర్కొన్నారు. పటిష్ఠ భద్రతా ఏర్పాట్లు, నిరంతర పర్యవేక్షణ, ఆధునిక సాంకేతిక పరిజ్ఞానం వినియోగం, వివిధ శాఖల మధ్య సమన్వయం వల్ల పోలింగ్‌ సజావుగా సాగిందన్నారు. పోలీసు ప్రధాన కార్యాలయంలోని కమాండ్ కంట్రోల్ సెంటర్‌ నుంచి ఆయన స్వయంగా పోలింగ్‌ సరళి, భద్రతా ఏర్పాట్లను పర్యవేక్షించారు. క్షేత్రస్థాయి పరిస్థితులను సమీక్షిస్తూ సీనియర్ పోలీసు అధికారులు, సిబ్బందికి ఎప్పటికప్పుడు ఆదేశాలు జారీ చేశారు.

కడప, కర్నూలు, అనంతపురం సహా మొత్తం 20 జిల్లాల నుంచి 41 ఎన్నికల సంబంధిత ఘటనలపై సమాచారం అందిందని డీజీపీ వెల్లడించారు. ఈ ఫిర్యాదులన్నింటినీ సమగ్ర కమాండ్ కంట్రోల్ సెంటర్‌ నిరంతరం పరిశీలిస్తోందన్నారు. ప్రతి ఘటనకు సంబంధించిన వాస్తవాలను క్షుణ్ణంగా ధ్రువీకరించి, బాధ్యులను గుర్తించి చట్టపరంగా కఠిన చర్యలు తీసుకోవాలని జిల్లా పోలీసు అధికారులను ఆదేశించినట్లు తెలిపారు. పోలింగ్‌ పర్యవేక్షణ కోసం వీడియో నిఘా, డ్రోన్లు, బాడీ వోర్న్ కెమెరాలు, ‘సమర్థ్’ యాప్‌ వంటి ఆధునిక సాంకేతిక వ్యవస్థలను విస్తృతంగా వినియోగించారు. ఎన్నికల ప్రక్రియకు ఆటంకం కలిగించే లేదా శాంతిభద్రతలకు విఘాతం కలిగించే ప్రయత్నాలను ఎట్టి పరిస్థితుల్లోనూ సహించబోమని డీజీపీ స్పష్టం చేశారు.