వాట్సప్ లో కొత్త ప్రైవసీ ఫీచర్...

మెటా సంస్థ వాట్సప్ యూజర్ల కోసం ‘ఇన్‌కాగ్నిటో చాట్ మోడ్’ పేరుతో కొత్త ప్రైవసీ ఫీచర్‌ను అందుబాటులోకి తీసుకొచ్చింది. ఏఐ అసిస్టెంట్‌తో సున్నితమైన సమాచారాన్ని మరింత భద్రంగా పంచుకునేందుకు ఈ ఫీచర్ ఉపయోగపడుతుందని కంపెనీ వెల్లడించింది. ఈ మోడ్‌లో జరిగే చాట్‌లు మెటాకు కూడా యాక్సెస్ కాకుండా సురక్షిత వాతావరణంలో ప్రాసెస్ అవుతాయని తెలిపింది. డీఫాల్ట్‌గా చాట్ సమాచారం సేవ్ కాకుండా ఆటోమేటిక్‌గా డిలీట్ అయ్యే విధంగా వ్యవస్థ పనిచేస్తుందని పేర్కొంది. వినియోగదారుల ప్రైవసీపై పెరుగుతున్న ఆందోళనల నేపథ్యంలో ఈ ఫీచర్‌ను తీసుకొచ్చినట్లు మెటా వెల్లడించింది.

ఇప్పటికే గూగుల్‌జెమినై, చాట్‌జీపీటీ వంటి ఏఐ చాట్‌బాట్‌లలో చాట్ హిస్టరీని డిసేబుల్ చేసే సదుపాయాలు ఉండగా, ఇప్పుడు వాటికి పోటీగా వాట్సప్ ఈ కొత్త మోడ్‌ను తీసుకొచ్చింది. యూజర్లు ఆరోగ్యం, ఆర్థిక అంశాలు, ఉద్యోగ సమాచారం వంటి సున్నితమైన ప్రశ్నలను తరచుగా అడుగుతున్న నేపథ్యంలో మరింత భద్రత కల్పించేందుకు ఈ ఫీచర్‌ను రూపొందించినట్లు కంపెనీ తెలిపింది. హానికరమైన ప్రశ్నలకు సమాధానాలు ఇవ్వకుండా ప్రత్యేక భద్రతా వ్యవస్థలు ఏర్పాటు చేసినట్లు వాట్సప్ హెడ్ క్యాథ్‌కార్ట్ తెలిపారు. ఈ ఫీచర్‌లో టెక్స్ట్ రూపంలో మాత్రమే ఏఐ సమాధానాలు అందుబాటులో ఉంటాయి. ఫోటోలు అప్‌లోడ్ చేసే అవకాశం ఉండదు. 13 ఏళ్లలోపు యూజర్లకు ఈ ఫీచర్ అందుబాటులో ఉండదని మెటా స్పష్టం చేసింది.