ఓపెన్‌ఏఐపై ఆపిల్ సంచలన కేసు..

ఏఐ సంస్థ ఓపెన్‌ఏఐ తమ వ్యాపార రహస్యాలు, గోప్యమైన హార్డ్‌వేర్ సమాచారాన్ని అక్రమంగా సేకరించి ఏఐ ఆధారిత పరికరాల అభివృద్ధికి ఉపయోగించిందని ఆరోపిస్తూ ఆపిల్ అమెరికాలోని నార్తర్న్ డిస్ట్రిక్ట్ ఆఫ్ కాలిఫోర్నియా కోర్టులో దావా వేసింది. ఓపెన్‌ఏఐ చీఫ్ హార్డ్‌వేర్ ఆఫీసర్ టాంగ్ టాన్‌తో పాటు మాజీ ఐఫోన్ ఇంజనీర్ చాంగ్ లియూ వంటి మాజీ ఆపిల్ ఉద్యోగుల ద్వారా గోప్య సమాచారాన్ని పొందిందని ఆపిల్ తన పిటిషన్‌లో పేర్కొంది.

ఉద్యోగ నియామకాల సమయంలో విడుదల కాని ఉత్పత్తుల వివరాలను అడగడం, మాజీ ఉద్యోగులకు సంస్థ నుంచి ఎలా బయటకు రావాలనే అంశంపై సూచనలు ఇవ్వడం, తయారీ భాగస్వాములను సంప్రదించడం వంటి ఆరోపణలను కూడా ఆపిల్ చేసింది. ఈ సమాచారాన్ని ఉపయోగించకుండా నిలిపివేయాలని, తమ మేధోసంపత్తిని తిరిగి ఇవ్వాలని, సంబంధిత సమాచారాన్ని ధ్వంసం చేయాలని కోర్టును కోరింది. అయితే ఈ ఆరోపణలను ఓపెన్‌ఏఐ పూర్తిగా ఖండిస్తూ, ఇతర కంపెనీల వ్యాపార రహస్యాలను వినియోగించే ఉద్దేశం తమకు లేదని స్పష్టం చేసింది.