కొత్త కంప్యూటర్ కొనాల్సిన అవసరం లేకుండా జియోపీసీ.. ధరలు, సదుపాయాలు ఇవే

కంప్యూటర్ కొనుగోలుకు అధిక మొత్తంలో ఖర్చు చేయలేని విద్యార్థులు, కుటుంబాలు, విద్యాసంస్థలకు ప్రత్యామ్నాయంగా రిలయన్స్ జియో జియోపీసీ సేవను అందిస్తోంది. క్లౌడ్ టెక్నాలజీ ఆధారంగా పనిచేసే ఈ సేవ ద్వారా కొత్త కంప్యూటర్ కొనకుండానే ఇప్పటికే ఉన్న ల్యాప్‌టాప్, డెస్క్‌టాప్, మానిటర్ లేదా అనుకూలమైన జియో సెట్‌టాప్ బాక్స్‌ను ఉపయోగించుకోవచ్చు. వెబ్ బ్రౌజర్ ద్వారా కూడా సేవను యాక్సెస్ చేయవచ్చు. యాక్టివ్ సబ్‌స్క్రిప్షన్ ఉన్న వినియోగదారులు ఇతర ఇంటర్నెట్ కనెక్షన్లను ఉపయోగించి కూడా సేవ పొందవచ్చని సమాచారం. విద్యార్థులు ఆన్‌లైన్ తరగతులు, కోడింగ్, పరిశోధన, డిజైన్ వంటి పనులకు దీన్ని వినియోగించుకోవచ్చు. పాత కంప్యూటర్లను పూర్తిగా మార్చకుండా వాటి ద్వారా కంప్యూటింగ్ సదుపాయాలను పెంచుకోవడం విద్యాసంస్థలకు మరో ప్రయోజనం.

జియోపీసీ రెండు ప్లాన్లలో లభిస్తుంది. 8జీబీ ర్యామ్, 500జీబీ స్టోరేజ్ కలిగిన సాధారణ ప్లాన్ ధర రెండు నెలలకు రూ.1,000, ఐదు నెలలకు రూ.2,000, 10+2 నెలలకు రూ.4,000. ఇక 16జీబీ ర్యామ్, 1టీబీ స్టోరేజ్‌తో కూడిన జియోపీసీ అల్ట్రా ప్లాన్ రెండు నెలలకు రూ.1,200, ఐదు నెలలకు రూ.2,500, 10+2 నెలలకు రూ.5,000గా ఉంది. ఉబుంటు ఆధారిత ఇంటర్‌ఫేస్, లిబ్రెఆఫీస్, వెబ్ బ్రౌజర్లతో డాక్యుమెంట్లు, స్ప్రెడ్‌షీట్లు, ప్రెజెంటేషన్లు తయారు చేసుకోవచ్చు. మైక్రోసాఫ్ట్ 365, అడోబ్ ఎక్స్‌ప్రెస్ వంటి ఆన్‌లైన్ సాధనాలను కూడా బ్రౌజర్ ద్వారా ఉపయోగించవచ్చు. కొన్ని సేవలకు ప్రత్యేక సబ్‌స్క్రిప్షన్ అవసరం కావచ్చు. కంప్యూటర్ లేదా సెట్‌టాప్ బాక్స్ దెబ్బతిన్నప్పటికీ క్లౌడ్‌లో నిల్వ చేసిన ఫైళ్లను భద్రపరిచే సదుపాయం ఉందని జియో తెలిపింది. అర్హత కలిగిన జియోహోమ్ కస్టమర్లు బ్రాడ్‌బ్యాండ్ బిల్లుపై నెలకు రూ.100 విలువైన వోచర్‌ను పొందే అవకాశం ఉంది. అయితే, ఈ సేవ పూర్తిగా ఇంటర్నెట్‌పై ఆధారపడుతుంది. అందువల్ల సబ్‌స్క్రిప్షన్ ధర, పరికరాల అనుకూలత, అవసరమైన సాఫ్ట్‌వేర్ ఖర్చులను పరిశీలించిన తర్వాతే ప్లాన్‌ను ఎంచుకోవడం మంచిది.