

భారతీయ పరిశోధకులకు మరింతగా ఏఐ సదుపాయాలను అందించేందుకు ఓపెన్ఏఐ తన ‘చాట్జీపీటీ ఫర్ అకడమిక్ రీసెర్చర్స్’ కార్యక్రమాన్ని విస్తరించింది. ఈ పథకం ద్వారా అర్హత కలిగిన పరిశోధనా అధ్యాపకులు, పోస్ట్డాక్టోరల్ పరిశోధకులు 12 నెలల పాటు ఉచితంగా చాట్జీపీటీని ఉపయోగించుకోవచ్చు. తాజా ప్రపంచవ్యాప్త విస్తరణలో భాగంగా మరో 50 వేల గ్రాంట్లను అందించాలని ఓపెన్ఏఐ లక్ష్యంగా పెట్టుకుంది. దీంతో ప్రపంచవ్యాప్తంగా ఉచిత యాక్సెస్ పొందే పరిశోధకుల సంఖ్య రెండు లక్షల వరకు చేరనుంది. ఎంపికైన ఒక్కో పరిశోధనా బృందానికి ప్రత్యేక వర్క్స్పేస్ ద్వారా మూడు చాట్జీపీటీ ప్లస్ అకౌంట్లు అందిస్తారు. అంటే ప్రధాన పరిశోధకుడితో పాటు మరో ఇద్దరు సహచరులు ఈ సదుపాయాన్ని ఉపయోగించుకోవచ్చు. కొత్త విడత దరఖాస్తుల స్వీకరణ నవంబర్ 23, 2026 నుంచి ప్రారంభం కానుంది. ముందుగా దరఖాస్తు చేసుకున్న అర్హులకు ప్రాధాన్యం ఇవ్వనున్నారు.
ఈ కార్యక్రమానికి అర్హత పొందాలంటే పరిశోధకులు గుర్తింపు పొందిన విద్యాసంస్థల్లో పనిచేస్తుండాలి. అలాగే గత మూడేళ్లలో arXiv, bioRxiv లేదా ChemRxivలో ప్రచురితమైన సంబంధిత పరిశోధనా పత్రానికి రచయితగా ఉండాలి. చాట్జీపీటీని తమ పరిశోధనల్లో ఎలా ఉపయోగించుకోబోతున్నారో కూడా వివరించాలి. పరిశోధనా పత్రాలను అధ్యయనం చేయడం, కొత్త ఆలోచనలను అభివృద్ధి చేయడం, డేటాను విశ్లేషించడం, కోడింగ్ చేయడం, కోడ్లోని లోపాలను సరిచేయడం, పరిశోధనా పత్రాలు, గ్రాంట్ దరఖాస్తులు సిద్ధం చేయడం వంటి పనులకు ఈ సదుపాయం ఉపయోగపడుతుంది. ఈ కార్యక్రమంలో భాగంగా షేర్ చేసే డేటాను తమ ఏఐ మోడళ్ల శిక్షణకు సాధారణంగా ఉపయోగించబోమని ఓపెన్ఏఐ తెలిపింది. పరిశోధకులకు ప్రత్యేక శిక్షణ, ఆచరణాత్మక సహకారం కూడా అందించనుంది.




















కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!