

ఉత్తర కొరియా అధినేత కిమ్ జోంగ్ ఉన్ మరోసారి అంతర్జాతీయ వార్తల్లో నిలిచారు. తన కుమార్తె కిమ్ జూ ఏతో కలిసి ఆయన ఓ పర్వత పర్యాటక ప్రాంతాన్ని సందర్శించారు. ఈ పర్యటన సందర్భంగా విడుదలైన ఫొటోలు ప్రపంచవ్యాప్తంగా చర్చనీయాంశంగా మారాయి. ముఖ్యంగా, కుమార్తె స్కీయింగ్ చేస్తుండగా కిమ్ జోంగ్ ఉన్ సోఫాలో కూర్చొని చేతిలో సిగరెట్ పట్టుకుని చిరునవ్వుతో కనిపించిన దృశ్యాలు అందరి దృష్టిని ఆకర్షించాయి. ఉత్తర కొరియా అధికారిక వార్తా సంస్థ కొరియన్ సెంట్రల్ న్యూస్ ఏజెన్సీ (కేసీఎన్ఏ) ఈ ఫొటోలను విడుదల చేసింది. సంస్థ వెల్లడించిన వివరాల ప్రకారం, నవంబర్ 15, 16 తేదీల్లో కిమ్ తన కుటుంబ సభ్యులు, ఉన్నతాధికారులతో కలిసి ర్యాంగ్గాంగ్ ప్రావిన్స్లోని సామ్జియోన్ ప్రాంతంలో జరుగుతున్న పర్యాటక అభివృద్ధి పనులను పరిశీలించారు. చైనా సరిహద్దుకు సమీపంలో ఉన్న ఈ ప్రాంతంలో కిమ్ జూ ఏ తెల్లటి దుస్తులు ధరించి స్కీయింగ్ చేస్తూ కనిపించారు. మరో ఫొటోలో కిమ్ జోంగ్ ఉన్ చేతిలో సిగరెట్తో సోఫాలో కూర్చొని నవ్వుతూ ఉండగా, ఆయన వెనుక భార్య రి సోల్ జూ కనిపించారు.
సామ్జియోన్ ప్రాంతాన్ని ఏడాది పొడవునా పర్యాటకులను ఆకర్షించే పర్వత పర్యాటక కేంద్రంగా అభివృద్ధి చేయాలని ఉత్తర కొరియా ప్రభుత్వం లక్ష్యంగా పెట్టుకుంది. ఇందులో భాగంగా స్కీయింగ్ కేంద్రాలు, హోటళ్లు, రవాణా సదుపాయాల అభివృద్ధితో పాటు విమానాశ్రయ ఆధునికీకరణ పనులు చేపడుతోంది. ఈ నిర్మాణాలను పరిశీలించిన కిమ్ జోంగ్ ఉన్ కొన్ని సదుపాయాలపై సంతృప్తి వ్యక్తం చేసినట్లు కేసీఎన్ఏ వెల్లడించింది. సామ్జియోన్ విమానాశ్రయ రన్వేను అంతర్జాతీయ పౌర విమానయాన సంస్థ (ఐసీఏఓ) ప్రమాణాలకు అనుగుణంగా విస్తరించాలని అధికారులను ఆదేశించినట్లు తెలిపింది. ఈ పర్యటనకు సంబంధించిన కిమ్ జోంగ్ ఉన్, కిమ్ జూ ఏ ఫొటోలు ప్రస్తుతం సోషల్ మీడియాలో వైరల్ అవుతున్నాయి. అంతర్జాతీయ మీడియా కూడా ఈ చిత్రాలపై ప్రత్యేక ఆసక్తి చూపిస్తోంది.




















కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!