లాంచ్‌కు ముందే లీకైన ఆసుస్, లెనోవో గూగుల్‌బుక్ ల్యాప్‌టాప్‌లు..

గూగుల్ మే నెలలో తన కొత్త Googlebook ల్యాప్‌టాప్ లైనప్‌ను ప్రకటించింది. తొలి తరం Googlebook ల్యాప్‌టాప్‌ల అభివృద్ధి కోసం Acer, Asus, Dell, HP, Lenovo వంటి ప్రముఖ బ్రాండ్లతో భాగస్వామ్యం కుదుర్చుకున్నట్లు వెల్లడించింది. అధికారిక లాంచ్‌కు ముందు Asus, Lenovo Googlebook ల్యాప్‌టాప్‌లకు సంబంధించిన రేండర్లు ఆన్‌లైన్‌లో లీక్ అయ్యాయి. వీటి ద్వారా ల్యాప్‌టాప్‌ల డిజైన్‌కు సంబంధించిన వివరాలు బయటకు వచ్చాయి. రెండు మోడళ్లు స్లిమ్ ఫారమ్ ఫ్యాక్టర్‌తో పాటు మూతపై ప్రత్యేకమైన గ్లో బార్ కలిగి ఉన్నట్లు కనిపిస్తున్నాయి. ఈ గ్లో బార్ నోటిఫికేషన్లు, ఛార్జింగ్ స్టేటస్ వంటి వివరాలను సూచించే అవకాశం ఉంది. Asus మోడల్ కార్బన్ గ్రే రంగులో, Lenovo మోడల్ లైట్ గ్రే రంగులో కనిపిస్తున్నాయి.

లీకైన రేండర్ల ప్రకారం Asus Googlebookలో HDMI పోర్ట్, రెండు USB Type-C పోర్టులు, రెండు USB Type-A పోర్టులు, 3.5mm ఆడియో జాక్ ఉండనున్నాయి. Lenovo మోడల్‌లో HDMI, రెండు USB Type-C పోర్టులు, ఒక USB Type-A పోర్ట్, హెడ్‌ఫోన్ జాక్ ఉన్నట్లు తెలుస్తోంది. Asus మోడల్‌లో Ultra-Ceramic Light Alloy చాసిస్‌ను ఉపయోగించే అవకాశం ఉంది. రెండు ల్యాప్‌టాప్‌లలోనూ Gemini Intelligence, Chrome బ్రౌజర్, Google Play Store, Magic Pointer వంటి ఫీచర్లు అందుబాటులో ఉండనున్నాయి. ChromeOS, Android సామర్థ్యాలను కలిపి ఈ Googlebook ల్యాప్‌టాప్‌లను రూపొందిస్తున్నట్లు గూగుల్ ఇప్పటికే ప్రకటించింది. వీటిని వచ్చే నెల బెర్లిన్‌లో జరిగే IFA 2026లో ఆవిష్కరించే అవకాశం ఉన్నప్పటికీ, అధికారిక లాంచ్ వివరాలను గూగుల్ ఇంకా వెల్లడించలేదు.